Halyqaralyq týrnırlerde 400-den astam medal jeńip alyndy
Qazaqstan dzúdo federasıasynyń prezıdenti Qaırat Qojamjarov ókilettiligin merziminen buryn toqtatý týraly usynysynan keıin QDF bas hatshysy Asqat Jitkeev prezıdent mindetin atqarýshy qyzmetine taǵaıyndaldy, dep habarlaıdy Almaty-akshamy.kz Olympic.kz-ke silteme jasap.
Óz kezeginde Qaırat Qojamjarov otandyq dzúdo qaýymdastyǵyna alǵysyn bildirdi.
«Dzúdo federasıasynyń prezıdenti ókilettigin merziminen buryn toqtatýyma baılanysty barlyq qazaqstandyq dzúdoshylarǵa, jattyqtyrýshylarǵa, federasıa menedjerlerine, Dzúdo dep atalatyn úlken otbasymyzǵa shynaıy alǵysymdy bildiremin!
Sizdermen birge jumys istegen qysqa merzim ishinde joǵary kásibıliktiń jáne jattyqtyrýshylar men sportshylardyń kúsh-jigeriniń arqasynda joǵary jetistikterge qol jetkizildi.
Halyqaralyq týrnırlerde 400-den astam medal jeńip alyndy. 2019 jyly 16 salmaq dárejesinde álemniń 61 elinen 462 sportshynyń qatysýymen uldar men qyzdar arasynda álem chempıonaty sátti ótti.
2021 jyldyń qorytyndysymen medaldar sany boıynsha Qazaqstan IJF halyqaralyq reıtıńinde 5-oryndy ıelendi.
2021 jyly bizdiń Eldos Smetov Tokıo-2020 XXXII jazǵy Olımpıada oıyndarynyń qola júldegeri atandy.
Sizderge birlesken tabystarymyz úshin shyn júrekten alǵysymdy bildiremin! Sizderge jańa jetistikter men jeńister tileımin!
Ujymǵa odan ári damý men yrys-bereke tileımin!», - delingen arnaıy habarlamada.
Qaırat Qojamjarov 2018 jyldyń 23 qazanynan bastap Qazaqstan dzúdo federasıasynyń prezıdenti qyzmetin atqaryp keldi. Federasıanyń jańa prezıdenti arnaıy Konferensıada saılanatyn bolady.