2022 jylǵy 18 naýryzda Almaty qalasy aýdandary ákimdikteriniń merdigerlik kásiporyndary aryq jelileri men aryq ótkelderin tazalady, dep habarlaıdy Almaty-akshamy.kz
Sý basýdyń aldyn alý jáne joıý úshin aýdan ákimdikterimen 650 jol jumysshysy, 266 birlik arnaıy tehnıka jáne 24 motopompa jumyldyryldy, 2000 qum salynǵan qap daıyndaldy. Jumys nátıjesinde 4,5 tonna qoqys pen tunba shyǵaryldy.
Naýryz aıynda bastalǵan jańbyr kezinde kezdeısoq turmystyq qoqystardyń jınalýyna, ótkizý qabiletiniń tómendigine, dıametrleriniń azdyǵyna jáne joldardyń júrý bóligi astyndaǵy jerasty aryq ótkelderiniń aqaýlaryna, jol tóseminiń opyrylýyna, sondaı-aq qarama-qarsy eńister men tuıyq aryq jelilerine baılanysty aryqtardan nóser sýlarynyń quıylý jaǵdaılary tirkeldi.
TJD málimetinshe, 18 naýryz kúni saǵat 18:00-degi jaǵdaı boıynsha 23 sý tasqyny tirkeldi: olardyń 8-i rastalmady, 7 joıyldy, qalǵan 8 ýchaske boıynsha jumystar jalǵasýda.