23 jasynda álemniń eń úzdik ýnıversıtetteriniń biri - Oksfordtan shaqyrtý alǵan qazaqstandyq qyz jaıly bilesiz be? Kishkentaıynan ǵylym jolynda eńbek etýdi armandaǵan Merýert esimdi aqtaýlyq arý óziniń bilim jolyndaǵy qyzyqty oqıǵalaryn áńgimelep berdi. Tolyǵyraq Aqshamnews.kz daıyndaǵan materıalda.
sýret: keıipkerdiń jeke arhıvinen
Merýert Bıjanova - The Ivy League (segiz jeke amerıkandyq ýnıversıtetterdiń qaýymdastyǵy - esk.) tizimindegi Pensılvanıa ýnıversıtetin támamdap, jaqynda Anglıadaǵy Oksford ýnıversıtetinen shaqyrtý aldy. Sondaı-aq, ol Pensılvanıa ýnıversıtetiniń eń joǵary marapaty – Penn Global Student Citizenship Award 2025 syılyǵynyń ıegeri dep tanyldy. Bul syılyq – halyqaralyq stýdentterdiń arasynda jahandyq azamattyqqa aıryqsha úles qosqan jastarǵa ǵana beriletin erekshe marapat.
"Ata-anam bilimimizge kóp kóńil bóldi"
Merýert bala kezinen ata-anasy bilimge erekshe mán bergenin aıtty. Olar durys ınvestısıanyń qashan da bilimge quıylý kerektigin túsingen.
"Men - Aqtaý qalasynyń týmasymyn. Ákem - ınjener-mashınıst, anam - psıholog. Bir jas úlken ápkem jáne ózimnen alty jas kishi inim bar. Bizge ata-anamyz únemi bilimniń qunyn túsindirdi. Búkil ınvestısıany bizdiń oqýymyzǵa jumsady. Ápkem ekeýmiz jarysyp sabaq oqıtynbyz jáne ata-anamyz úı tapsyrmasyn oryndaýǵa únemi qoldaý kórsetetin. Sol tárbıe meni qanattandyrdy. Kishketaıymnan ǵylymǵa, bilimge qushtar boldym. Ata-anam maǵan "muǵalim bol" deıtin. Men joǵary oqý ornynda sabaq bersem dep armandaıtynmyn", - deıdi ol.
sýret: keıipkerdiń jeke arhıvinen
Nazarbaev ýnıversıtetinen Pensılvanıaǵa deıingi jol
Merýerttiń aıtýynsha, armanǵa aparar jol Aqtaýdaǵy "Daryn" mektebinen bastalyp, Nazarbaev Zıatkerlik mektebinde jalǵasqan.
"NZM-niń hımıa-bıologıa baǵytynda oqydym. Ol mektep maǵan asqaq arman qoıýdy, jahandyq deńgeıde oılaýdy úıretti. Al keıin NZM-nen keıin Nazarbaev Ýnıversıtetine oqýǵa tústim. NÝ-da profesorlarymyz bizdi ǵalym retinde qalyptastyrýǵa tyrysty. Ǵylymǵa qyzyǵýshylyǵym tereńdeı berdi. Úshinshi kýrsta júrip men shetelde oqý múmkindikterin qarastyrdym. Oqytýshylarym bul nıetime qoldaý bildirdi. Oqýǵa tapsyryp, AQSH-tyń, Kanadanyń, Ulybrıtanıanyń birneshe JOO-laryna qabyldandym. Biraq The Ivy League ýnıversıtetteriniń qataryndaǵy Pensılvanıaǵa qujat tapsyrýdy uıǵardym. Maǵan ondaǵy akademıalyq erkindik, myqty orta unady", - deıdi Merýert.
Pensılvanıada Merýert ózin tolyq dáleldeý úshin kóp eńbektengenin aıtady. Ol jeti márte premıa alyp, halyqaralyq stýdentter isi jónindegi komıtettiń prezıdenti bolyp saılandy.
"Bir sátte 20 myńǵa jýyq magıstrant, doktorant stýdentterdiń arasynan meni prezıdent etip saılady. Bul - eń aldymen zor eńbek pen máselelerdi jan-jaqty qarastyra alatyn qasıetimniń arqasy dep oılaımyn", - deıdi ol.
sýret: keıipkerdiń jeke arhıvinen
"Meniń artymda elim tur" degen ustanym boldy"
Merýert qandaı qadamǵa barsa da birinshi kezekte Qazaqstannyń atyna kir keltirmeýdi oılap turatynyn jasyrmady. Ol ózin barynsha dáleldeýge tyrysyp, sheteldikter arasynda qazaqstandyq jastar jaıly pozıtıvti pikir qalyptastyrýdy maqsat etken.
"Men qaıda júrsem de "meniń artymda elim tur" degen ustanym boldy. Ne istesem de, jaqsylyq jasasam da, jamandyq jasasam da, ol erteń meniń elimniń atyna jazylady dep túsinemin. Sol sebepti bar kúshim qazaqtyń abyroıyn kóterýge baǵyttaldy. Pensılvanıada qazaqstandyq stýdentter az. Menen keıin qazaq jastary qujat tapsyrsa, "oo, biz qazaqtardy bilemiz, olar bilimdi" degen túsinik qalyptassa, bul – men úshin úlken jeńis", - deıdi Merýert.
sýret: keıipkerdiń jeke arhıvinen
"Oksfordqa túsetinime senbedim"
Merýert Oksford ýnıversıtetinen shaqyrtý alǵan sátin erekshe tolqynyspen eske aldy.
"Ǵalym bolǵym keldi. Sol armannyń jolynda tynymsyz eńbek ettim. Halyqaralyq joǵary bilimdi damytý mamandyǵy boıynsha Oksfordtan shaqyrtý aldym. Ǵylymı jetekshilerim, myqty profesorlar meniń bilimimdi barlyq jaǵynan synady. Emtıhan kezinde óte kúrdeli ǵylymı suraqtar qoıyldy. Men týraly aldyn ala izdep oqyp ta shyqqan eken. Nátıjesinde shaqyrtý alǵanyma ózim de birazǵa deıin senbedim. Endi Oksfordta doktorantýrada izdenisimdi jalǵastyramyn", - deıdi Merýert.
Aıta keteıik, Oksford ýnıversıteti – álemdegi eń ejelgi jáne eń bedeldi oqý oryndarynyń biri. Ol XII ǵasyrda qurylǵan. QS World University Rankings jáne Times Higher Education sıaqty halyqaralyq reıtıńterde Oksford úzdik úshtikten túspeıdi. Munda álemniń túkpir-túkpirinen eń úzdik ǵalymdar men stýdentter bilim alady. Ǵylym men bilimdi damytýǵa qosqan úlesi úshin Oksford túlekteri arasynda Nobel syılyǵynyń laýreattary men álemdik deńgeıdegi saıasatkerler, jazýshylar men zertteýshiler óte kóp.