Saryarqanyń tórínde boı túzegen elordamyz Astana – táuelsíz Qazaqstannyń ǵana emes, búkíl Evrazıyanyń júregíne aınalǵan aru qala. Búgín, 6 - shílde Astananyń tuǵan kúní. Osydan 27 jyl būryn astanamyz belgíleníp, ózíníń tarıhı datasyn qalyptastyrǵan edí. Sodan berí ne ózgerdí? Qandaı ǵımarattar boı kóterdí? Aqshamnews.kz tílshísí elordanyń tuǵan kúníne oraı tarıh keńístígíne syr shertíp, Astananyń alǵashqy kelbetínen kadrlardy jınaqtady.
Sol jaq jaǵalaudyń tynysy
Astana kúnín búkíl Qazaqstan bolyp alǵash ret 2006 jyly 6 shíldede atap óttí. Araǵa taǵy ekí jyl salyp 2008 jyly 18 shíldede būl kún resmı túrde memlekettík mereke mártebesíne ıe boldy. Bıyl elímízdíń bas qalasy Astananyń astana mártebesín ıelengeníne 27 jyl tolyp otyr.
1990 jyldary sol jaǵalau keń jazyq dala bolatyn. Uaqyt óte kele būl jer Astananyń kelbetíne aınaldy. Qazír elorda dese bírden sol jaq jaǵalaudaǵy ǵımarattar elesteıdí.
suret: informburo.kz
"QazMūnaıGaz" jáne "Nūrjol" bulvary
Qala sımvolyna aınalǵan taǵy bír nysan - būrynǵy "QazMūnaıGaz" ǵımaraty. 2002 jyly salynǵan būl nysanda búgínde túrlí memlekettík mekemeler men energetıka mınıstrlígí ornalasqan. Al "Nūrjol" bulvarynyń boıynda ornalasqan mańyzdy ǵımarattar "Soltústík shūǵyla" TK – 2008, QTJ ǵımaraty – 2009, "Kazmedıa ortalyǵy" – 2011, "Izumrudnyı kvartal" – 2011 jyly soǵylǵan.
"QazMūnaıGazdyń" artynda 2010 jyly "Han Shatyr" sauda-oıyn-sauyq ortalyǵy, al 2013 jyly janynda "Astana Opera" teatry salyndy.
"Astana Trıumfy" men Tūran dańǵyly
2006 jyly salynǵan "Astana Trıumfy" ǵımaratynyń art jaǵynda búgínde bírneshe tūrǵyn keshen bar: Grand Opera, Sensata, "Delfın". Sonymen qatar, qazír Tūran dańǵylynyń boıynda boı túzegen meıramhanalar alleyasy da qalaǵa erekshe sán beredí.
Lenın alańynan - Parlamentke
Būrynǵy Lenın alańy - kezíndegí Tselınogradtyń sımvoly bolatyn. 1979 jyly mūnda "Tselıngıproselhoz" jobalau ınstıtutynyń 16 qabatty ǵımaraty salyndy. Aqmola astana bolǵan soń mūnda Parlament kóshíp keldí. Qazír būl nysan - Prezıdent janyndaǵy Memlekettík basqaru akademıyasy.
1964 jyly salynǵan Keńester úıí Aqmola astana mártebesín alǵan soń Úkímet rezıdentsıyasyna aınaldy. Búgínde būl jerde Astana qalasy ákímíníń apparaty ornalasqan.
Jastar saraıy
Jastar saraıy - alǵashynda "Jastar úıí" retínde jobalanyp, 1974 jyly ashyldy, Qarsy betínde ornalasqan "Turıst" qonaq úıí (1984) álí kúnge deıín ózíníń atauyn saqtap otyr.
Eskí vokzal
Tselınogradtyń eskí temírjol vokzaly - 60 jyldan asa tarıhy bar nysan. Qazír - qosalqy termınal, al 1990 jyly salynǵan jańa bıík ǵımarat - negízgí vokzal retínde qyzmet etíp otyr.
suretter: informburo.kz