Qazir mınımalızmge bet burǵan kúlli álem birkelki túster men reńkterge bet burǵandaı kórinedi. Kóshede ashyq tústi, qyzyldy-jasyldy kıingen adamdardy sırek kezdestiremiz. Bir qaraǵanda zıany joq sekildi osy birkelki tústerdiń adam psıhıkasyna aıtarlyqtaı áseri bar eken. Túster marketıńte qalaı qoldanylady? Ejelgi dáýirde antıkalyq músinder qandaı bolǵan? Osy saýaldardyń jaýabyn Aqshamnews.kz tilshisi zerttep kórdi.
"Appaq bólme" azaptaýmen teń
Sarǵysh (bejevyı) tús búginde sán-saltanat pen minsiz stıldiń sımvolyna aınaldy. Sán men dızaın salasynda ol bazalyq tús retinde keń qoldanylady. Qazirgi tańda adamdardyń kıimi ǵana emes, úı ıntereri de kóbine solǵyn, sarǵysh, aqshyl reńkterge jaqyn.
Sýret: Estima.ru
Alaıda ǵalymdar birtústi ómir salty psıhıkalyq aýytqýlarǵa, tipti psıhozǵa deıin aparýy múmkin dep eskertedi.
"Aq bólme" - túrmelerde qoldanylatyn eń qatal azaptaý túrleriniń biri. Alǵashynda bári gýmanısik kórinedi: tutqyndy tek aq tústen basqa eshteńe joq bólmege qamaıdy. Biraq dál osy orta adamnyń psıhıkasyn kúıretedi.
"Mundaı bólmede uzaq ýaqyt bolý aýyr psıhoemosıalyq kúıge, ońashalaný sezimine, mazasyzdyqtyń artýyna, depressıaǵa, elesterge, tipti psıhozǵa ákelýi múmkin", – deıdi psıholog, art-terapevt Marıa Býlgakova.
Degenmen, aq tústi ǵana qabyldaıtyn adamdar da bar. Olar úshin basqa túster titirkendirgish áser beredi. Bul qubylys hromofobıa dep atalady.
"Hromofobıa - bul jaı ǵana tústen qorqý emes, belgili bir túske nemese reńkke degen jıirkenish, qabyldamaý jáne jaǵymsyz emosıalar", – deıdi Býlgakova.
Marketıńtik aılalar: túster adam sanasyna qalaı áser etedi?
Qyzyl tústi zattar kóbine oılanbaı satyp alynady. Marketologtardyń pikirinshe, durys tańdalǵan tús kez kelgen taýardyń ótimdiligin arttyra alady. Statısıkaǵa súıensek, satyp alýshylardyń 85%-y aldymen taýardyń túsine nazar aýdarady, al sapasy men basqa sıpattary ekinshi orynda qalady.
Taýardyń kemshiligi bolsa da, túsi unasa - satyp alý yqtımaldyǵy joǵary.
"Qyzyl tús adamdy ımpúlsıvti sheshim qabyldaýǵa ıtermeleıdi. Kók tús senim uıalatady, al jasyl – ekologıa, tabıǵılyq jáne ishki tynyshtyqpen baılanysty", - deıdi psıholog.
Qandaı tús dámhanaǵa tabys ákeledi?
Kelýshileri úzilmeıtin jaıly meıramhana ashqyńyz kele me? Onda ıntererdegi tústerdiń mańyzy zor. Keı túster tábetti ashsa, keıbiri kerisinshe áser etedi.
Kolorado shtaty ýnıversıtetiniń zertteýshileri jyly tústermen, ásirese qyzǵylt sary reńktermen bezendirilgen oryndarda qonaqtar uzaq otyratynyn jáne kóbirek tapsyrys beretinin anyqtaǵan.
Eksperımentke qatysýshylar tústerdiń tamaqtan alǵan áserge tikeleı yqpal etetinin aıtqan. Keı bólmelerde tátti dám aıqyn sezilse, basqa ortada ondaı áser bolmaǵan.
Antıkalyq músinder bastapqyda aq bolmaǵan
Búginde biz aq mármárdan jasalǵan antıkalyq músinderdi klasıkalyq ónerdiń shyńy dep qabyldaımyz. Alaıda eki myń jyl buryn Rım men Grekıadaǵy músinder múlde basqa keıipte bolǵan – olar túrli-tústi edi.
Adam deneleri tabıǵı reńktermen boıalyp, kıimderi qanyq tústermen bezendirilgen. Bul qazirgi kórermen úshin tosyn kórinýi múmkin.
Ǵalymdardyń bul jańalyǵy kópshilikti tańǵaldyrdy: antıkalyq músinder malahıt, lazýrıt, kınovar syndy tabıǵı boıaýlarmen árlengen.
Orta ǵasyrdaǵy gotıkalyq arhıtektýra da bir kezderi ashyq ári jarqyn bolǵan. Ýaqyt óte kele boıaýlar óship, biz olardy "asqaq klasıka" retinde qabyldaı bastadyq.
Qazirgi tańda ǵalymdar men restavratorlar antıkalyq ónerdiń bastapqy boıaýlaryn qaıta qalpyna keltirýmen aınalysyp júr. Nemis arheology Vınsens Brınkmann bul salada 20 jyldan astam ýaqyt eńbek etip keledi.
"Biz mıkroskop pen últrakúlgin jaryqtyń kómegimen burynǵy tústerdi anyqtaımyz", – deıdi ol.
Brınkmann jasaǵan antıkalyq músinderdiń túrli-tústi 3D úlgileri álemniń kóptegen qalasynda kórmege qoıylyp júr. Kórermen pikiri san alýan bolǵanymen, eshkimdi beıjaı qaldyrmaıtyny anyq.
Mınımalızm tepe-teńdik bolǵanda ǵana paıdaly
Birkelki túster men mınımalızm - zamanaýı ómir saltynyń ajyramas bóligine aınaldy. Artyq dúnıeden arylý, kózge tynyshtyq syılaıtyn orta qalyptastyrý rasynda adamdy sharshatpaıdy. Alaıda bul úrdis shekten shyqqanda, keri áser berýi múmkin.
Psıhologtardyń aıtýynsha, tústerdiń tapshylyǵy mıǵa túsetin sensorlyq aqparatty azaıtyp, emosıalyq jutańdyqqa, kúızeliske jáne mazasyzdyqqa ákeledi. Ásirese balalar úshin túrli-tústi orta - qıaldy, oılaýdy jáne emosıalyq damýdy qamtamasyz etetin mańyzdy faktor.
Mınımalızm ómirdi jeńildetýi tıis, al ony birsaryndy, "tússiz" keńistikke aınaldyrý adam tabıǵatyna qaıshy. Ǵasyrlar boıy túrli-túske baı mádenıet qalyptastyrǵan adam balasy úshin tolyqtaı aq nemese sarǵysh álem qaýipsiz dep aıtý qıyn.
Sondyqtan sarapshylar mınımalızmdi tyıym emes, tepe-teńdik retinde qabyldaýǵa keńes beredi. Aq pen bejevyı tynyshtyq syılasa, ashyq túster ómirge qýat, emosıa jáne serpin beredi. Eń bastysy, psıhıkalyq saýlyqty birinshi orynǵa qoıý.