Qazaqstan Respýblıkasynyń Ulttyq ulany ózderiniń kásibı merekesin atap ótti.
Osydan 34 jyl buryn qurylǵan áskerı qurylym búginde eldiń qoǵamdyq qaýipsizdigin qamtamasyz etýde, strategıalyq mańyzdy nysandardy qorǵaýda jáne tótenshe jaǵdaılarda azamattardyń qaýipsizdigin saqtaýda mańyzdy ról atqaryp keledi.
Ataýly kúnge oraı «Ońtústik» óńirlik qolbasshylyq basqarmasynda saltanatty jıyn ótti. İs-shara barysynda áskerı bólimderdiń Ulttyq ulan quramyndaǵy eleýli kezeńderin qamtyǵan beınesújetter kórsetilip, jeke quramǵa ótken jyldardaǵy jaýyngerlik jáne qyzmettik joly tanystyryldy.
Saltanatty jıynda «Ońtústik» óńirlik qolbasshylyǵynyń qolbasshysy general-maıor Talapker Ámireev jeke quramdy kásibı merekemen quttyqtap, áskerı qyzmetshilerdiń el qaýipsizdigin qamtamasyz etýdegi eren eńbegin erekshe atap ótti. — Ulttyq ulan jaýyngerleri — qoǵamdyq tártiptiń saqshylary, el tynyshtyǵynyń tiregi. Sizderdiń tabandy eńbekterińiz ben joǵary jaýapkershilikterińiz memleket qaýipsizdiginiń berik negizi bolyp tabylady, — dedi qolbasshy.
Saltanatty jıynda minsiz qyzmetimen jáne jaýyngerlik daıyndyqtaǵy joǵary kórsetkishterimen erekshelengen birqatar áskerı qyzmetshiler Qazaqstan Respýblıkasy İİM orynbasary - Ulttyq ulan Bas qolbasshysynyń jáne óńirlik qolbasshynyń buıryqtaryna sáıkes arnaıy tósbelgilermen, alǵys hattarmen jáne gramotalarmen marapattaldy. Ulttyq ulan áskerine qoǵamdyq tártipti saqtaý, memlekettik mańyzy bar nysandardy kúzetý, sondaı-aq tótenshe jaǵdaılar men qarýly qaqtyǵystar kezinde azamattardyń qaýipsizdigin qamtamasyz etý sekildi mańyzdy mindetter júktelgen. Osy jaýapty qyzmetti atqara otyryp, Ulttyq ulan jaýyngerleri kún saıyn Otan aldyndaǵy boryshyna adal ekenin isimen dáleldep keledi.
Aıta keteıik, Ulttyq ulannyń qurylǵan kúnine arnalǵan saltanatty sharalar «Ońtústik» óńirlik qolbasshylyqqa qarasty barlyq áskerı bólimderde de uıymdastyrylyp, jeke quramǵa rýh beretin mazmundy is-sharalar ótti. Ulttyq ulan kúni — el qaýipsizdigi jolynda qyzmet etip júrgen árbir áskerı qyzmetshiniń eńbegin baǵalaıtyn, olardyń Otanǵa degen adaldyǵyn aıshyqtaıtyn erekshe mereke.