Alǵashqy jumys otyrysy tamyz aıyna josparlandy
«AMANAT» partıasynyń Ortalyq apparatynda Kólik jáne logıstıka komıtetiniń uıymdastyrý jónindegi otyrysy ótti. Sonyń barysynda komıtettiń quramy men erejesi bekitildi, dep habarlaıdy Almaty-akshamy.kz partıanyń baspasóz qyzmetine silteme jasap.
Komıtet tóraǵasy bolyp Parlament Májilisiniń depýtaty, «AMANAT» partıasy fraksıasynyń múshesi Samat Aqyshev saılandy.
Sala mamandarynyń pikirin eskere otyryp, Komıtet quramyna temirjol tasymaldaýshylary qaýymdastyǵynyń, vagon operatorlarynyń, ulttyq ekspedıtorlardyń, jolaýshylar kóliginiń, bıznes-qoǵamdastyqtyń, beıindi mınıstrlikterdiń ókilderi jáne taǵy basqalar kirdi.
Otyrys barysynda salanyń tranzıttik ınfraqurylymyn damytý, sheteldik tasymaldaýshylardy kólik baqylaýynan ótkizýdiń jetkiliksizdigi, 3 myńnan astam qoǵamdyq kólik júrgizýshisiniń tapshylyǵy sıaqty máseleler kóterildi.
Partıa hatshysy Eldar Jumaǵazıev atap ótkendeı, Qazaqstannyń Ortalyq Azıa, Reseı, Qytaı jáne Eýropa elderin ózara baılanystyryp turǵan tıimdi geografıalyq jaǵdaıyn eskere otyryp, elimiz kólik-logıstıka salasynyń áleýetin tolyq paıdalana alady.
Komıtet músheleri kólik saıasaty strategıasyn ázirleý jáne otandyq tasymaldaýshylardyń básekege qabilettiligin arttyrý, tranzıttiń jańa baǵyttaryn pysyqtaý, ınfraqurylymdy damytý boıynsha keshendi sharalar qabyldaý qajet ekenin atap ótti.
Komıtettiń alǵashqy jumys otyrysy tamyz aıynyń basyna josparlanyp otyr.