Elordada prezıdenttik «Altyn sapa» jeńimpazdaryn marapattaýdyń XV mereıtoılyq saltanaty ótti
Oǵan Memleket basshysy Qasym-Jomart Toqaev qatysyp, 10 jyl ishinde óńdeý ónerkásibiniń ekonomıkadaǵy enshisi taý-ken salasynyń kórsetkishinen asyp, 13%-ǵa jetkenin erekshe atap ótti, dep habarlaıdy Almaty-akshamy.kz
«Bıylǵy saltanatty jıyn Táýelsizdiktiń 30 jyldyq mereıtoıymen tuspa-tus kelip otyr. Munyń zor sımvoldyq máni bar. Egemendik kezeńinde Qazaqstanda bıznestiń damýyna jan-jaqty jaǵdaı jasaldy. Sonyń nátıjesinde jańa zamanǵa saı kásipkerler shoǵyry qalyptasty. Olar ulttyq ekonomıkanyń basty qozǵaýshy kúshine aınalýda», - dedi Prezıdent.
«Altyn sapa» konkýrsyna qatysýǵa Almaty qalasynan 33 kompanıa ótinish bergen bolatyn. Onyń ishinde 19 kásiporyn qujattardyń tolyq toptamasyn usynǵan jáne konkýrstyń kelesi kezeńine jiberilgen.
Bıyl Almaty qalasynyń 8 kompanıasy «Altyn sapa» syılyǵynyń júldegeri atandy. Atap aıtsaq, «Óndiristik baǵyttaǵy úzdik kásiporyn» nomınasıasy laýreattarynyń biri – Almaty Indýstrıaldy aımaǵynda ornalasqan «DOC Co.LTD» JSHS, al «Qyzmet kórsetetin úzdik kásiporynnyń» biri – «INVITRO-Kazahstan» JSHS. Sondaı-aq, eki almatylyq kásiporyn «İsker» syılyǵyn jeńip aldy. Bul júlde QR Prezıdentiniń «Altyn sapa» júldesi úshin konkýrsqa jáne «Qazaqstannyń úzdik taýary» respýblıkalyq baıqaý-kórmesine qatysýshy kompanıalardyń arasynan beriledi. Shaǵyn kásipkerlik sýbektileriniń arasyndaǵy jeńimpazdardyń biri – «Elena» tigin óndirisi» JSHS, al iri kásipkerlik sýbektileriniń ishinen «KazFerroStal» JSHS sýyrylyp alǵa shyqty.
«Úzdik áleýmettik jaýapkershilikti kásiporyn» nomınasıasynda «KAZ MINERALS AKTOGAY» JSHS, «Ekologıaǵa qosqan úlesi úshin» nomınasıasynda «Alina group» JSHS «Paryz» syılyǵynyń kúmis músinshesin jeńip aldy.
Memleket basshysy otandyq kompanıalardyń básekege qabilettiligin jáne ónimdiligin arttyrý úshin sapanyń zamanaýı júıelerin engizý qajettigin atap ótti. Sondaı-aq, Halyqaralyq úzdik úlgilerge jáne tájirıbelerge sáıkes bolýy úshin «Altyn sapa» talaptaryn kezeń-kezeńmen sapany basqarýdyń eýropalyq standartynyń jańa úlgisine sáıkestendirýdi usyndy.