Túrksib aýdanyndaǵy elektr jelileriniń uzyndyǵy 1 200 km
Bul týraly Óńirlik komýnıkasıalar qyzmetiniń baspasóz konferensıasynda Túrksib aýdanynyń ákimi Baqytjan Aqjarov málimdedi, dep habarlaıdy Almaty-akshamy.kz.
Spıker qazirgi ýaqytta Qaırat shaǵyn aýdanynda Tuzdybastaý qosalqy stansıasynyń qurylysy jalǵasyp jatqanyn atap ótti. Ony 2022 jyldyń jeltoqsan aıynda aıaqtaý josparlanyp otyr. Qosalqy stansıa Qaırat jáne Nurshashqan shaǵyn aýdandarynyń 12 myńnan astam turǵynyn turaqty elektrmen jabdyqtaýdy qamtamasyz etedi. Sondaı-aq odan Medeý jáne Almaty oblysynyń Talǵar aýdandary turǵyndarynyń bir bóligi elektr energıasyn alatyn bolady.
Baqytjan Aqjarov Álmerek, Shýaqty, Qaırat jáne Nurshashqan shaǵyn aýdandarynda ishkikvartaldyq elektrmen jabdyqtaý jelilerin rekonstrýksıalaý jobasy ázirlengenin habarlady. Qurylys-montaj jumystary 2022 jylǵa josparlanǵan.
Túrksib aýdanyndaǵy elektr jelileriniń uzyndyǵy 1 200 km (tozýy 67%) quraıdy.
«Bıyl biz 3 taratýshy qosalqy stansıa men 25 transformatorlyq qosalqy stansıaǵa aǵymdaǵy jóndeý jumystaryn júrgizdik. Bul elektrmen jabdyqtaý sapasyn edáýir jaqsartty, mysaly Shemákın kóshesiniń turǵyndary kerneýdiń tómendeýine jıi shaǵymdanady, jóndeý aıaqtalǵannan keıin olar toqtady», - dedi Baqytjan Aqjarov.
Osy jyly «AJK» AQ kásipornynyń balansyna 15 jeke transformatorlyq qosalqy stansıa men 7,3 km jeli berilgeni belgili boldy, sonyń arqasynda 700-den astam abonenttiń tólem tarıfi kVt úshin 29 teńgeden 19,8 teńgege deıin tómendedi.
Ákim jeke sektordy gazdandyrý týraly aıtyp berdi. Búginde Túrksib aýdany gaz magıstraldyq jelilerimen 100% qamtylǵan. Aýdanda barlyǵy 25 128 jeke menshik úı bar, onyń 25 033-i gazdandyrylǵan. Halyqtyń áleýmettik osal toptarynyń 25 úıi gazǵa tegin qosyldy. Qalǵan úıler qosylý ústinde.
1 165 kóppáterli turǵyn úıde turatyn aýdannyń 100 myńnan astam turǵyny ortalyq jylýmen qamtylǵan. Búginde «Vokzal» qazandyǵyn qaıta qurý jumystary aıaqtalýǵa jaqyn. Jumys bitken soń 4 myńnan astam turǵyn turaqty jylýmen qamtamasyz etiledi.