Bul týraly Óńirlik komýnıkasıalar qyzmetinde ótken brıfıńte «Qarjy ortalyǵy» AQ ókilderi aıtty.
Spıkerlerdiń aıtýynsha, jataqhana salý óte tıimdi ınvestısıa.
Brıfıń barysynda «Qarjy ortalyǵy» AQ ilgeriletý jáne syrtqy komýnıkasıalar departamentiniń dırektory Aınur Saǵyndyqova almatylyqtarǵa aldaǵy 8 jylǵa memlekettik tapsyrysty ornalastyrýdyń ornyna stýdentter jataqhanalaryn salý usynylyp jatqanyn aıtty, dep habarlaıdy Almaty-akshamy.kz.
«Qazirgi tańda elimizde stýdenttik jataqhanalarda belgili bir oryn tapshylyǵy baıqalady. Bul máseleni sheshý úshin SHOB sýbektileriniń belsendi qatysýyn kózdeıtin memlekettik tapsyrys mehanızmi ázirlendi. Kásipker óz qarajaty esebinen nysanǵa kiredi. Sátti kirgen kezde memleket memlekettik tapsyrys beredi. Memlekettik tapsyrysty ornalastyrýdyń basty sharty – stýdenttiń turatyn jeri», - dedi A.Saǵyndyqova.
«Qarjy ortalyǵy» ókiliniń aıtýynsha, kez kelgen áleýmettik nysannyń qurylysy tabysty, turaqty ǵana emes, bolashaǵy zor bıznes joba. Munyń bári nysandy óz qarajatyna salǵan jobaǵa qatysýshynyń 8 jyl boıy paıdalanýǵa berilgennen keıin árbir alǵan tósek orny úshin memleketten tólemaqy alatyndyǵynan.
Bir stýdentke shaqqandaǵy memlekettik tapsyrystyń jyldyq mólsheri kelesi kórsetkishterden turady: qurylys – 122 AEK, Almaty qalasy boıynsha – 144 AEK, qaıta qurý – 47 AEK, Nur-Sultan jáne Almaty qalasy boıynsha – 92 AEK.
Aıta keterligi, búginde respýblıka boıynsha stýdentter jataqhanalarynda jalpy oryn tapshylyǵy 84 129 tósek-oryn bolsa, onyń 40 417-si Almaty qalasynda.
Aınur Saǵyndyqova jobanyń arqasynda 2019 jyly 9166 oryndy 10 jataqhana, 2020 jyly 20 266 oryndyq 75 jataqhana jáne 2021 jyly 30 630 oryndy 124 jataqhana salynǵanyn aıtty.
Almatyda 2018-2021 jyldar aralyǵynda 3970 tósek-oryndy 19 stýdenttik jataqhana paıdalanýǵa berildi. Bıyl megapolıs 1696 oryndyq úsh stýdenttik jataqhanany paıdalanýǵa berýdi josparlap otyr.
Brıfıńtiń taǵy bir qatysýshysy, «Qarjy ortalyǵy» AQ ilgeriletý jáne syrtqy komýnıkasıalar bóliminiń sarapshysy Dıas Djambýlov kásipkerlerge jataqhana ǵımarattaryn salý ǵana emes, qaıta jóndeý jumystary da usynylyp jatqanyn aıtty.
«Eger kásipker qurylys salýǵa nıet bildirse, onda ol «Qarjy ortalyǵy» AQ-na jer teliminiń qujattaryn tapsyrýy kerek. Stýdenttik jataqhanaǵa qaıta qurýdy qajet etetin ǵımaraty bolsa, qujatyn da tapsyryp, onymen aldyn ala kelisimshart jasalady. Kelesi kezekte nysandy 24 aı ishinde paıdalanýǵa berý. Qarjylyq resýrstar jetkiliksiz bolǵan jaǵdaıda, jeńildikti nesıe alý úshin «Damý» qoryna júginýge bolady», - dep túsindirdi D.Djambýlov.
20 jyl boıy jataqhanany basqa maqsatta paıdalanýǵa bolmaıtynyn este ustaǵan jón. Degenmen, keıin nysandy kepilge, satýǵa, jalǵa berýge bolady.
Sóziniń sońynda «Qarjy ortalyǵynyń» ókili jataqhana qurylysynyń tetigin jetildirý boıynsha jańa sharalarǵa toqtaldy.
«Investorlarmen talqylaý qorytyndysy boıynsha memlekettik tapsyrysty ornalastyrý mehanızmin qaıta qaraýdyń kelesi nusqasy usynyldy: tólem merzimin 8 jyldan 6 jylǵa deıin qysqartý, sonymen birge tólemder kólemin 20%-ǵa arttyrý. Eger búginde Almaty qalasynda 8 jylǵa tólem normasy 144 AEK bolsa, 6 jylǵa ár jyl ishinde 230 AEK usynylady», - dedi D. Djambýlov.
Sondaı-aq, spıker stýdenttik jataqhana salýǵa sheshim qabyldaǵan ınvestorlardyń birqatar artyqshylyqtary baryn, olar qosymsha tabys kózderine ıe bolatynyn eske saldy. Mysaly, stýdentterdiń aı saıynǵy turý aqysy memlekettik tapsyrys qunyna kirmeıdi. Onyń kólemin jataqhana ıesi retteıdi jáne belgili bir aımaqtaǵy turǵyn úı naryǵynyń jaǵdaılarymen anyqtalady. Sondaı-aq, ol negizgi tutynýshylary turǵyndar (asqana, shashtaraz, sport zaly jáne t.b.) bolatyn jeke qyzmetterdi kórsetý úshin komersıalyq keńistik qura alady.