Almatylyq ýrologtar joǵary tehnologıalardyń kómegimen zeınetkerge kúrdeli ota jasady
Ortalyq qalalyq klınıkalyq aýrýhanada nesep joldary patologıasymen túsken 66 jastaǵy pasıentke kúrdeli ota jasaldy. Operasıa mindetti áleýmettik medısınalyq saqtandyrý sheńberinde jasaldy, dep habarlaıdy almaty-akshamy.kz OQKA baspasóz qyzmetine silteme jasap.
1956 jyly týǵan er adam kópten beri kishi dáreti turmaı aýyrǵan. Tekserý barysynda ýrologtar oǵan qýyq dıvertıkýli degen dıagnoz qoıdy.
Ýrolog Baqyt Dosqojaevtyń aıtýynsha, dıvertıkýl – qýyq qabyrǵasynyń qalta tárizdenip ketýi. Bul qýyqasty bezi adenomasy, úrpiniń tarylýy, nesep-zár joldaryndaǵy isik, qýyq moınynyń stenozy syndy aýrýlar saldarynan týyndaıtyn dert.
«Er adamǵa ota jasaý qajet boldy. Biz eshbir tiliksiz, shaǵyn ınvazıvti endoskopıalyq operasıa jasadyq. Endoskoptyń kómegimen jasalatyn bul operasıa qan ketýdiń aldyn alyp, pasıenttiń tezirek jazylyp ketýine múmkindik beredi. Zeınetkerge epıdýraldy jansyzdandyrý ádisi qoldanyldy. Ota 40 mınýtqa sozyldy. Pasıent erteńine aıaqqa turdy», - dep atap ótti dáriger.
Dıvertıkýldi dári-dármekpen emdeý múmkin emes, ol tek qana hırýrgıalyq ádispen emdeledi, deıdi maman.