Almatynyń Ortalyq stadıonynda ótken Qazaqstan chempıonatynyń sońǵy týrynda «Qaırat» fýtbol klýby ózderiniń basty qarsylasy — «Astana» komandasyn qabyldady. Alań ıelerine chempıondyq ataqty resmı túrde rastaý úshin teń esep te jetkilikti bolatyn. Kezdesý solaı aıaqtaldy.
Qonaqtar sapynan Tomasov birinshi taımda esep ashsa, úzilisten keıin sátti shabýyl uıymdastyrǵan Sátbaev tarazy basyn teńestirdi. Nátıje — 1:1.
Bul nátıjemen «Qaırat» qatarynan ekinshi ret chempıon atanyp, klýb tarıhyndaǵy besinshi altyn júldesin jeńip aldy.
Sonymen qatar, komanda Qazaqstan Premer-lıgasy tarıhyndaǵy rekordtyq 16-shy medal jıyntyǵyn ıelendi.
Budan bólek, «Qaırat» kelesi maýsymda ÝEFA Chempıondar lıgasyna el namysyn qorǵaýǵa múmkindik aldy.
Kórermender arasynda qazaqstandyq fýtboldyń ardagerleri men Almaty ákimi Darhan Satybaldy da boldy. Úzilis kezinde qala basshysy 2025 jylǵy maýsym qorytyndysy boıynsha «Qaırat» akademıasynyń tárbıelenýshilerin marapattady.
Klýb tarıhynda alǵash ret Akademıanyń barlyq jas komandasy óz lıgalarynda chempıon atandy.
