Qalada qalyptasqan jaǵdaıǵa baılanysty 71 myńnan astam balany qamtyǵan 860 mektepke deıingi uıym (190 memlekettik jáne 670 jeke menshik) 5 qańtardan bastap óz jumysyn ýaqytsha toqtatty.
Almaty qalasy bilim basqarmasynyń basshysy Lázzat Jylqybaeva Almaty qalasynyń tynys-tirshiligin qalpyna keltirý jónindegi qalalyq shtab otyrysy barysynda bilim berý uıymdaryndaǵy oqý prosesine daıyndyq týraly baıandady, dep habarlaıdy Almaty-akshamy.kz
Bilim basqarmasy basshysynyń aıtýynsha, TJ rejımi aıaqtalǵannan keıin 20 qańtardan bastap balabaqshalardyń jumysyn qaıta bastaý josparlanýda. Bul rette qaladaǵy epıdemıologıalyq jaǵdaı mindetti túrde eskeriletin bolady, sondyqtan balabaqshalar kezekshi toptar rejıminde jumys isteýi múmkin. Mektepke deıingi mekemelerdiń jumys tártibi týraly ata-analar men qyzmetkerler arasynda túsindirý jumystary qosymsha uıymdastyrylatyn bolady.
«Búginde tótenshe jaǵdaı kezinde mektepke deıingi mekemelerdi qarjylandyrý máselesi ashyq kúıinde qalyp otyr, atap aıtqanda, 30 640 oryndyq 519 jekemenshik balabaqshada, sondaı-aq 173 memlekettik balabaqshada ornalasqan memlekettik tapsyrys týraly sóz bolyp otyr», - dep atap ótti Jylqybaeva.
Bilim basqarmasynyń basshysy mektepterdegi qysqy demalys 17 qańtarǵa deıin, kolejderde 24 qańtarǵa deıin uzartylǵanyn eske saldy. Qalada epıdemıologıalyq ahýaldyń nasharlaýyna baılanysty 17 qańtarda oqýshylar qashyqtyq formatta sabaqtarǵa kiristi.
«Bizde qashyqtan oqytý formatynda jumys tájirıbesi bar, muǵalimder ótken jyly sıfrlyq saýattylyqty arttyrý kýrstarynan ótti. Oqý prosesin uıymdastyrý úshin barlyq jaǵdaı jasalǵan, ata - analar kompúterlerge nemese noýtbýkterge, ınternetke qosylý qajettiligi týyndaǵan jaǵdaıda mektep dırektoryna nemese aýdandyq bilim bólimderine júgine alady, onda olarǵa osy máselelerdi sheshýge kómektesedi», - dedi Lázzat Jylqybaeva.
24 qańtardan bastap 83 kolejdiń 73 myńnan astam almatylyq stýdenti sabaqqa kirisedi, olar úshin oqytýdyń aralas formaty kózdelgen: dáristik sabaqtar onlaın-rejımde ótkiziledi, al praktıkalyq sabaqtar sanıtarıalyq talaptardy saqtaı otyryp, ıkemdi keste boıynsha oflaın uıymdastyrylady.