4-shi synyp oqýshysy qalada ótken is-sharalardyń birinde «Ustazym» ánin oryndaǵan ánshige orta joldan qosylyp, jurttyń nazaryn ózine aýdardy.
Beınejazbany áleýmettik jelide bir táýlikte 3 mıllıon adam qarap, 10 jastaǵy búldirshinniń erekshe daýysyna súısingen, dep habarlaıdy Almaty-akshamy.kz 24.kz-ke silteme jasap.
Aıbar dál osy baınejazba arqyly tanymal bolamyn dep oılamaǵany anyq. Alaıda súıkimdi búldirshinniń belgili ándi kásibı maqammen oryndaýy kópshilikti beıjaı qaldyrmady. Osynsha yqylasqa Aıbardyń ózi de ań-tań.
"Óte kúshti sezimdemin. Sebebi meniń qasymda ánshi turady. Ol ánshi óte tanymal. Men fýtbolǵa qatty qumarmyn. Matematıkadan olımpıadaǵa qatysqanda birinshi oryn alyp keldim. Bolashaqta án aıtatyn fýtbolıst nemese fýtbol oınaıtyn ánshi bolamyn", - deıdi №201 mektep-gımnazıanyń 4-synyp oqýshysy Aıbar Ábdiámıt.
Aıbar - jan-jaqty bala. Matematıka pánin jan-tánimen jaqsy kóredi. Fýtbol dese, ishken asyn jerge qoıady. Mektepte akterlik sheberlik úıirmesine qatysady. Otbasyndaǵy tórt balanyń ekinshisi.
Aıbardyń tanymal bolýyna sebepker bolǵan ánshi Samat Janǵazın: «Onyń bolashaǵyna zor úmit artamyn», - deıdi. Daýsymen jumys istep, konkýrstyq ánderge beıimdeý kerektigin aıtady.
"Bulaq kórseń, kózin ash" deıdi ǵoı qazaq. Talantty talant dep aıtý kerek. Daýsy zor. «Ustazym» ánin aıtqan kezde, daýsy joǵaryǵa qaraı ketip jatyr ǵoı. Dımash aǵasynyń jolyn bersin!" - deıdi ánshi Samat Janǵazın.
Samat Janǵazın Aıbarmen birge dýet jazýdy josparlap otyr. Sondyqtan, bir kúnde-aq kóptiń kózqýanyshyna aınalǵan Aıbardy úlken sahnadan kóretin kún alys emes.