Kúdikti qamaýǵa alyndy.
Almatyda er adam jalǵan dollarǵa krıptovalúta satyp almaq boldy, dep habarlaıdy Almaty-akshamy.kz Polisia.kz-ke silteme jasap.
Er adam krıptovalúta satyp alý kezinde jalǵan banknottarmen tólem jasamaq bolǵan.
«Bizdiń bólimshege alaıaqtyq deregi boıynsha jergilikti turǵyn júgindi. Onyń aıtýynsha, belgisiz bireý krıptovalúta satyp alý kezinde oǵan jalǵan 100 myń dollar tólemek bolǵan. İs júrgizý barysynda jábirlenýshiniń ınternet arqyly krıptovalútany iri kólemdegi sommaǵa satýǵa keliskeni anyqtaldy. Kezdesý josparlanǵan bolatyn, onda satýshy krıptoámıanǵa elektrondy aqshany aýdardy. Alaıda «satyp alýshy» krıptovalútany alǵanyn rastamady jáne ony aldadyń dep aıyptaýǵa tyrysty. Bul aldyn ala oılastyrylǵan alaıaqtyqtyń bóligi bolyp shyqty. Kúdikti qamaýǵa alyndy. Ol A.esimdi azamat bolyp shyqty. Belgili bolǵandaı, ustalǵan azamat vırtýaldy aqshany satyp alý boıynsha óz mindettemelerin oryndaǵysy kelmegen, sondyqtan ol kezdesýge jalǵan dollarlyq kýpúralardy alyp kelgen», – dedi Almaly aýdandyq polısıa basqarmasynyń bastyǵy Esen Ysqaqov.
Atalǵan derek boıynsha tergeý QR QK-niń 190-baby 4-bóligine sáıkes qylmystyq isti tirkedi. Kúdiktige qatysty qamaýǵa alý túrindegi bultartpaý sharasy tańdaldy. Qazirgi ýaqytta polısıa qyzmetkerleri atalǵan zańsyz árekettiń yqtımal sybaılastaryn anyqtaý jáne ustaýǵa baǵyttalǵan jedel izdestirý jáne tergeý is-sharalaryn júrgizip jatyr.