Birqatar keńes berdi.
Almatynyń sanıtarlyq dárigerleri Ramazan aıynda tamaqtan ýlaný men jiti ishek ınfeksıalarynan saqtanýǵa shaqyrdy, dep habarlaıdy Almaty-akshamy.kz QazAqparat silteme jasap.
Qazir epıdemıologıalyq jaǵdaıdyń turaqtanýyna baılanysty barlyq shekteý sharalary alynyp tastaldy.
«Bul aýyz ashar kezinde adamdardyń kóptep jınalýyna múmkindik beredi. Biraq, ózińizdiń jáne jaqyndaryńyzdyń qaýipsizdigi úshin KVI-diń qarapaıym aldyn alý sharalary týraly umytpańyz. Orazalaryńyz qabyl bolsyn!» - delingen departament taratqan habarlamada.
Sonymen qatar, mamandar tamaqtan ýlanýdan jáne JİI aýrýlarynan qorǵaný úshin birqatar keńes usynady. Atap aıtqanda:
- jaramdylyq merzimi ótken, tańbasy anyq emes nemese joq ydysta deformasıa jáne bombaj belgileri bar tamaq ónimderin ruqsat etilmegen saýda oryndarynan almaý kerek;
- eger ydystyń bútindiginiń buzylý belgileri bolsa, muzdatylǵan azyq-túlikti satyp almańyz;
- tez buzylatyn taǵamdar men daıyn salattardy bólme temperatýrasynda 2 saǵattan artyq saqtamańyz, sebebi bul bakterıalar men toksınderdiń jınalýyna ákelýi múmkin;
- respıratorlyq jáne asqazan-ishek aýrýlarynyń belgileri bar naýqastardyń tamaq daıyndaýyna jol bermeńiz;
- úıde jeke gıgıena erejelerin jáne ystyq, sýyq taǵamdardy daıyndaý tehnologıasyn, tamaq ónimderiniń, ásirese, tez buzylatyn jáne shıki ónimderdiń jaramdylyq merzimi men saqtaý sharttaryn saqtaý kerek, sondaı-aq daıyn taǵamdy bólek saqtaý qajet;
- shıki jáne daıyn ónimderge bólek pyshaq pen taqtaı paıdalanyńyz;
- kókónis, jemis-jıdekterdi aǵyndy sý astynda, al balalar úshin qaınaǵan sýmen muqıat jýyńyz;
- salattar, tartylǵan et ónimderin az mólsherde daıyndap, taǵamdardy bir kúnnen artyq saqtamańyz;
- jańa daıyndalǵan taǵamdy aldyńǵy kúnniń qaldyqtarymen aralastyrmańyz.
Eger daıyn taǵam kelesi kúnge qalsa, ony qoldanar aldynda termıalyq óńdeýden ótkizý kerek (qaınatyńyz nemese qýyryńyz);
- taǵamdardy, ásirese, et, qus eti, jumyrtqa jáne teńiz ónimderin muqıat qýyryńyz nemese qaınatyńyz;
- torttardy tońazytqyshta saqtańyz, sonymen qatar bul tez buzylatyn taǵam ekenin umytpańyz;
- sý ishýge jáne tamaq daıyndaýǵa súzilgen sýdy paıdalanyńyz.