Almatydaǵy №1 qalalyq klınıkalyq aýrýhananyń torakaldy hırýrgıa ortalyǵy kókirek qýysyna operasıa jasaýǵa mashyqtanǵan. Sonyń biri – keńirdekke jasalatyn manıpýlásıalar. Qyzmet tegin medısınalyq kómek jáne saqtandyrý paketi arqyly kórsetiledi, dep habarlaıdy Almaty-akshamy.kz aýrýhananyń baspasóz qyzmetine silteme jasap.
Torakaldy hırýrgtar keńirdek stenozy dıagnozy qoıylǵan 56 jastaǵy pasıentke osyndaı ota jasady. Ol bıylǵy aqpan aıynda kovıd juqtyryp, pnevmonıanyń aýyr túrimen aýyrǵan.
Hırýrg Muhtar Nysanbaıdyń aıtýynsha, pasıent uzaq ýaqyt boıy jansaqtaý bóliminde, keıin ıntensıvti terapıa bóliminde jatqan. «Ókpeni jasandy jeldetý apparatymen uzaq ýaqyt boıy dem alǵandyqtan, keńirdegine traheostomıa jasalǵan. Aýrýhanadan shyqqannan keıin araǵa bir aı salyp dem jetpeı alqynyp, tynystaǵanda keýdede ysqyryq paıda bolǵan. Kompúterlik tomografıa men bronhoskopıa nátıjesinde keńirdektiń tómengi bóliginiń tarylǵany anyqtalyp, sırkýlárly stenoz degen dıagnoz qoıyldy», - deıdi dáriger.
Keńirdek stenozy nemese keńirdektiń tarylýy uzaq ýaqyt jasandy tynys alý apparatymen dem alǵan, traheostomıa jasalǵan, moıyn jaraqatyn alǵan, keńirdegi men jutqynshaǵy kúıgen, keńirdek jolynda isik paıda bolǵan pasıentterde kezdesedi. Bul dert aýanyń ókpege túsýin qıyndatady.
Torakaldy hırýrgter endoskopıalyq elektroeksızıa dep atalatyn operasıa jasady. Qazir pasıenttiń jaǵdaıy jaqsy. Tynys alý jetkılıksızdıgı baıkalmaıdy.
«Sońǵy kezde mundaı jaǵdaılar jıi kezdesetin boldy. Bul dertten ásirese, jasandy tynys alý apparaty arqyly uzaq ýaqyt dem alǵan jáne keńirdegine tilik jasalǵan adamdar zardap shegedi. Olar demikpedegi sıaqty tunshyǵyp, aýa jetpeı qınalady, qaqyryq túsýi qıyndaıdy», - deıdi Muhtar Nysanbaı.
Torakaldy hırýrgıa ortalyǵyndaǵy ÝDZ, fıbroendoskop, KT, MRT syndy zamanaýı qondyrǵylar operasıany asqan dáldikpen júrgizýge múmkindik beredi. Shalǵaı eldi mekenderdiń turǵyndary elektrondy hat nemese telefon arqyly aldyn ala syrttaı konsýltasıa ala alady. Sonymen qatar, munda kóshpeli qabyldaý jáne ota jasaý múmkindigi de qarastyrylǵan.