Shokoladtan jasalǵan óner týyndysy kórermen nazaryna usynyldy.
Almatynyń Ortalyq mýzeıine qoıylǵan eksponattarǵa bes júz keliden astam shokolad jumsaldy. Munda tátti buıymdar men músinderdi kezdestirýge bolady. Taqyryp san alýan. As úı jabdyqtary, baý-baqsha ónimderi, haıýanattar baǵy... osynyń bárin bir jerden kóre alasyz. Budan bólek aýyz tıýge de bolady, dep habarlaıdy Almaty-akshamy.kz 24.kz-ke silteme jasap.
Kádimgi pıngvın, pýdel ıt, sport kýbogy, fýtbol doby, jemis-jıdek pen kókónis salynǵan sebetter. Osynyń bári tátti ıisi ańqyǵan taza tabıǵı shokoladtan jasalǵan. Syrty ıtalıalyq glazýrmen qaptalǵan. Shynaıy shyqqandyǵy sonshalyq onyń shokolad ekendigine sený qıyn.
«Biz kórgen týyndylarda sondaı keremet jasalǵan. Sonymen qatar bizde sheberlik synyby boldy jáne de onyń aldynda degýstasıa boldy. Shokoladtyń 8 túriniń dámin kórdik. Bizge unady. Maǵan eń qatty unaǵany ol – lımondy shokolad. Dámi erekshe boldy. Onyń quramynda úsh qospa bar eken», - deıdi stýdent Toǵjan Demejanova.
Shokoladtan buıym jasaý ońaı sharýa emes. Oǵan shydamdylyq, túptep kelgende yjdahattylyq kerek. «Sonda ǵana kópshilikti tańǵaldyratyn dúnıe paıda bolady», – deıdi sheberler. Kórmege kelýshiler sol naǵyz qolynan bal tamǵan aspazdarmen kezdesip, keńesterin tyńdady. Tipti olardy úılerine shaqyryp, óz asúılerinde shokolad jasaýǵa múmkindik berildi. Reseı shokolad mýzeıi ókilderiniń aıtýynsha, arnaıy qaptamasy bolmasa, bul zattardyń pishini tez buzylady. Sondyqtan ony tasymaldaǵanda asa abaı bolǵan jón.
«Árbir eksponat úshin qorap jasattyq. Onyń ózi sol músinniń nemese buıymnyń kóshirmesi sıaqty bolýy tıis. Sonda ǵana ǵana eksponattardy saqtaı alamyz. Qysta tasymaldaýǵa jeńil. Erip ketedi dep qoryqpaımyz. Jazda árıne, tońazytqyshsyz júrmeımiz. Onyń ózinde belgili bir temperatýrada ustaımyz», - shokolad mýzeıiniń ókili Aleksandra Galkına.
Eske sala keteıik, bul kórme álemniń 70-ke tarta qalasynda bolǵan. Ony Qazaqstan, Reseı, Ázerbaıjan, Qytaı sıaqty elderdiń turǵyndary tamashalaǵan. Jalpy mundaı shokoladtyń jaramdylyq merzimi 3 jyl. Sondyqtan eksponattardy únemi jańartyp otyrady.