Kıiz basý ónerin meńgergender Almatyda halyqaralyq festıválde bas qosty.
Birneshe myń jyl buryn Ortalyq Azıadan bastalǵan kıiz basý óneri búginde álemniń kóp eline tarap, úlken kásipke aınaldy. Tekemet basý men syrmaq tigýdi sheteldikter qazir de úırenip júr, dep habarlaıdy Almaty-akshamy.kz «Habar 24» caıtynaa silteme jasap.
Kıiz – bul nomadtar oılap tapqan toqyma emes, matanyń eń kóne túri. Kóshpeliler úshin qasıetti mánge ıe. Mamandardyń aıtýynsha, kezinde aq kıizge kóterip han saılanǵan. Al náresteni juqa jáne jyly kıiz jaıalyqqa oraǵan.
Almatydaǵy Qasteev murajaıynda erekshe kórme ashyldy. Munda kıizden basylǵan túrli tekemetter qoıylǵan. Ekspozısıalardyń jartysynan kóbi shet eldik sheberlerdiń qolynan shyqqan.
«Tekemetter ártúrli elde basylǵanymen órnektiń túrleri men pishinderinde aıyrmashylyq joq», – deıdi sheberler. Óıtkeni kıiz basý óneri Ortalyq Azıadan taraǵan. Túrkıadan kelgen sheber Salıh Gırgıch sheberlik saǵatynda mozaıka ádisimen kıiz basýdyń qyr-syryn kórsetti.
«Qazaq pen túrikterdiń kıiz basý dástúrinde aıtarlyqtaı aıyrmashylyq joq. Biz tek syrmaq jasamaımyz. Kıiz basýmen ǵana aınalysamyz. Bizde kıiz basý atadan balaǵa mura bolyp keledi. Atam 1965 jyly bastaǵan kásipti ákem jalǵastyryp, qazir men osy dástúrdi damytyp júrmin», - deıdi Túrkıadan kelgen kıiz basý sheberi Salıh Gırgıch.
Kıiz basýshy sheberlerdiń halyqaralyq festıvali elimizde birinshi ret uıymdastyrylyp otyr. Mádenı murany dáripteýshiler Ortalyq Azıa elderinen ózge Túrkıa, AQSH, Vengrıa, Shveısarıa, Golandıa, Anglıa jáne Fransıadan kelgen.
«Qazaqtarda kıiz basý áıelderdiń isi. Erkekter tek aýyr jumystarǵa kómektesedi. Al Túrkıa men Iranda kıiz basýmen kóbinese kásip retinde erkekter aınalysady. Odan keıin kóptegen el qoıdyń júnin qalypqa qolmen jaıady. Túrikter arnaıy tyrmany paıdalanady. Al oıýlar qolmen qoıylady», - deıdi Qazaqstan Qolónershiler odaǵynyń tóraıymy Aıjan Bekqulova.
Kıiz basýshylardy bir jerge toǵystyrǵan halyqaralyq festıvál bir aptaǵa josparlanǵan. Aldaǵy kúnderi qolónershiler tájirıbe almasyp, sheberlik sabaqtaryn ótkizedi.