Sebebi, oqý ornyn bitirýi tıis qyz-jigitterdiń deni emtıhannan shekti bal jınaı almaı súringen.
Testileýge qatysqan 426 stýdenttiń teń jartysy ótpeı qalǵan, dep habarlaıdy Almaty-akshamy.kz
Almatyda jekemenshik medısınalyq kolej stýdentteri dıplomyn ala almaı júr. Biraq stýdentter muny ózderinen emes, testti daıyndaǵan ortalyqtan kórip otyr.
KTK telearnasynyń habarlaýynsha, Qarlyǵash Jolshybekovanyń eki balasy osy kolejdi bıyl bitirip, dıplom alý kerek bolǵan. Biraq uldary qorytyndy memlekettik attestasıalaýdyń alǵashqy kezeńinen súringen. Buǵan ol testileý ortalyǵyn kinálap otyr. Aıtýynsha, test suraqtarynyń qurylymy durys bolmaǵan.
«Aqsha tólep qatysqan testten 80-90 bal alyp júrgen. Áskerge shaqyryp jatyr. Povestka kelip qoıǵan. Kolejden jylda anyqtama alyp beremiz ǵoı, onyń merzimi shildede bitti. Tórt balaǵa járdemaqy alatynbyz, ol da toqtap qaldy. Bizdiń suraqtarymyzdyń ishinde zańnyń suraqtary júr deıdi. Túsiniksiz, aýdarmasy anyq emes, túsinbeımiz dep aıtty», - dedi Qarlyǵash Jolshybekova.
Jıylǵandar arasynda bolashaq tis dárigerleri, jalpy tájirıbelik dárigerler men pedıatr mamandary bar. Olar da testileýde berilgen suraqtar múlde túsiniksiz dep otyr. Al qaıtadan tapsyrýǵa jarty jyldan keıin ǵana múmkindik berilgen. Tek ol ýaqytta stýdentterdiń biri joǵarǵy oqý ornyna túse almaı qalamyz dese, ekinshisi dıplomsyz áskerge alyp ketedi dep ýaıymdaıdy. Sol sebepti qaıta tapsyrý ýaqytyn jaqyndatsa degen ótinish bar.
«Biz jumys isteı almaımyz. Sebebi bizde dıplom joq. Biz stýdent retinde de sanalmaımyz. Jigitterdi áskerge alyp ketýi múmkin. Óte kóp stýdent joǵarǵy oqý ornyna túskisi kelgen. Olar da oqýyn ary qaraı jalǵastyra almaı otyr. Biz bulaı jarty jyl kútip otyrǵymyz kelmeıdi. Bizge qaıta tapsyrý ýaqytyn erterek jasap bersin. Men óz mamandyǵym boıynsha jumys istegim keledi», - dedi Rýfına Alımova.
Jalpy testileýge 426 stýdent qatysqan eken. Onyń teń jartysy ótpeı qalǵan. Kolej basshylyǵy bul iske aralasa almaıtynyn, stýdentterden testileýdi táýelsiz emtıhan ortalyǵy alǵanyn aıtty.
«Sońǵy synaq tapsyratyn testter bizge ashyq emes. Biz ony bilmeımiz qandaı suraqtar kelip jatqanyn. Biz testti bilmeıtin bolǵannan keıin oǵan baǵa bere almaımyz. Biz sol týraly Densaýlyq mınıstrligine jazdyq ta, aıttyq ta. Endi ol kisiler qandaı sheshim qabyldaıdy, biz bilmeımiz», - dedi medısınalyq-stomatologıalyq kolejdiń dırektory Sáýirbek Rýzýddınov.
Al test ortalyǵyndaǵylar báriniń talapqa saı ekenine senimdi. Suraqtar aldyn ala daıyndalyp, bilikti mamandardyń tekserisinen ótken deıdi olar.
«Emtıhanda qoldanylǵan orys jáne qazaq tilindegi test suraqtary 2023 jyldyń mamyr aıynda testologıalyq jáne mazmundyq saraptamadan ótkizildi. Qazaq tiline aýdaratyn maman ıeleriniń bizde eki túri bar. Olardyń medısınalyq bilimi bar jáne memlekettik tildi baǵalaıtyn qazaqsha test boıynsha lıngvıs mamandar bizde jumys isteıdi», - dedi «Ulttyq táýelsiz emtıhan ortalyǵynyń» mamany Marjan Sháripova.