Balalar qalalyq klınıkalyq juqpaly aýrýlar aýrýhanasyna júkteme artty
Áleýmettik jelide almatylyqtar balalar qalalyq klınıkalyq juqpaly aýrýlar aýrýhanasynda áıelder men erler balalarymen bir palatada jatqanyn aıtyp shaǵymdandy, dep habarlaıdy Almaty-akshamy.kz.
Jeli qoldanýshylardyń aıtýynsha, Almaty balalar qalalyq klınıkalyq juqpaly aýrýlar aýrýhanasynda bos palatalar bola tura, áıelder men erler balalarymen bir palatada jatyr. Osy jaǵdaıǵa baılanysty atalǵan aýrýhananyń dáriger-sarapshysy Farıda Ǵabbasova túsinik berdi.
Dárigerdiń sózinshe, sońǵy ýaqytta balalar qalalyq klınıkalyq juqpaly aýrýlar aýrýhanasyna júkteme artty.
Aýrýhana táýlik boıy pasıentterdi qabyldaıdy, táýligine 300-ge jýyq bala júginedi. Sol pasentter qabyldaý bólimshesi deńgeıinde suryptalyp, tek 25-30%-y stasıonarǵa jatqyzylady, al qalǵan naýqastar ambýlatorıalyq jaǵdaıda, úıde emdelýge jiberiledi.
«Osyǵan oraı epıdemıologıalyq maýsymda, ıaǵnı joǵarǵy tynys joldarynyń aýrýlary órshigen kezde, er adamdarǵa kútim jasaý jónindegi jeke palatalardy birden qamtamasyz etý múmkin emes ekenin aıtamyz jáne naýqastar palatalarǵa aýrýdyń túri boıynsha, sıkldylyqty saqtaı otyryp ornalastyrylady. Qazirgi epıdemıologıalyq jaǵdaıdy eskere otyryp, jedel respıratorly ınfeksıa, sekretorly jáne ınvazıvti dıareıalar provızorlyqlyq bólimshelerge ýaqytsha (KVI-ge PSR shyqqansha) ornalastyrylady, keıbir palatalarda oryn bos bolǵany osymen baılanysty (nozologıa jáne sıkldylyqty saqtaý maqsatynda). Bizdiń mekeme ár pasıentke túsinistikpen qaraıdy jáne týyndaǵan máselelerdi sheshýge kómektesýge árqashan daıyn, birinshi múmkindik týyndaǵan sátte ol kisiler bólek palatalarǵa ornalastyrylady»,- dedi Farıda Ǵabbasova.