Ulttyq bilim akademıasy 1921 jyly Orynbor qalasynda Alash kóshbasshysy Ahmet Baıtursynulynyń bastamasymen qurylǵan
Almaty qalasynda Y.Altynsarın atyndaǵy Ulttyq bilim akademıasynyń 100 jyldyq mereıtoıyna arnalǵan birqatar is-shara ótti, dep habarlaıdy Almaty-akshamy.kz «Habar 24» telearnasyna silteme jasap.
İs-sharalarǵa bilim berý salasynyń qurmetti qyzmetkerleri, qoǵam qaıratkerleri jáne Akademıada uzaq jyldar boıy qajyrly eńbek etip, qazaq biliminiń damýy men órkendeýine úles qosqan ǵalymdar qatysty. Mereıtoıǵa arnalǵan is-shara Ahmet Baıtursynulynyń eskertkishine gúl shoqtaryn qoıý jáne Alash zıalysynyń mýzeı-úıine barý rásimderinen bastaý aldy.
Odan soń Abaı atyndaǵy Qazaq Ulttyq pedagogıkalyq ýnıversıtetiniń ǵımaratynda Akademıanyń 100 jyldyǵyna arnalǵan konferensıa ótti. Konferensıa aıasynda Akademıa damýynyń tarıhı aspektileri, qazaqtyń kórnekti tulǵalarynyń oǵan qosqan úlesi, sondaı-aq Akademıanyń qazaqstandyq bilim berý júıesin damytý men qalyptastyrýdaǵy róli qarastyryldy.
Saltanatty is-shara sońynda Akademıa prezıdenti Ǵanı Beısembaev konferensıaǵa qatysýshylarǵa Ulttyq bilim akademıasynyń damýy men qazaq biliminiń órkendeýine, bilim berýdiń mazmuny men ádistemesin jetildirýge sińirgen eńbekteri úshin alǵys hattar tabys etti.
Y.Altynsarın atyndaǵy Ulttyq bilim akademıasy 1921 jyly Orynbor qalasynda Alash kóshbasshysy Ahmet Baıtursynulynyń bastamasymen qurylǵan. Akademıa óz qyzmetin 1933 jyldan beri Almaty qalasynda júzege asyrdy, al 2009 jyldan bastap Nur-Sultan qalasynda ornalasqan.
Akademıanyń maqsaty ǵylymı negizdelgen oqý-ádistemelik, ozyq ınovasıalyq tehnologıalardy ázirleý jáne engizý arqyly qazaqstandyq bilim-ǵylymdy zaman talabyna saı damytý bolyp tabylady. Osy maqsatqa jetý jolynda Akademıa jetekshi ǵylymı-zertteý, ádisnamalyq, oqý-ádistemelik, konsaltıńtik hab retinde qalyptasýda.