18 jeltoqsanda saǵat 11:00 Almatyda "Walking Football" (júrmeli fýtbol) boıynsha 1-týrnır ótedi. Týrnırdi Almaty qalasy sport basqarmasy uıymdastyrady, Almaty fýtbol federasıasy tórelik etedi. Sharanyń ótetin orny – "Qaırat" fýtbol akademıasy.
Júrmeli fýtbol – jasy 50-den asqan azamattarǵa arnalǵan fýtbol oıyny, alǵashynda ártúrli sebepterge baılanysty dástúrli oıyndy oınaı almaıtyn fýtbolsúıer aǵa býyn ókilderi úshin arnaıy Ulybrıtanıada shyǵarylǵan bolatyn. Júrmeli fýtboldy zalda da, ashyq alańda da oınaýǵa bolady. Oıyn erejeleri fktzaldaǵy fýtbolǵa uqsas, basty ereksheligi – júgirýge bolmaıdy. Eger oıynshy júgirip kelse, onda oǵan shtraf salynady. Taǵy bir mańyzdy ereje – dop bastan joǵary kóterilmeýi kerek. Zalda fýtzalǵa arnalǵan doppen oınalsa, ashyq alańda kádimgi fýtbol dobyn paıdalansa bolady.
2011 jyldan beri fýtboldyń bul túri Ulybrıtanıada qarqyndy damyp keledi, qazirdiń ózinde el boıynsha myńdaǵan komanda men lıga bar, komanda oıynshylary arasynda 50-den asqan, 60-ty alqymdaǵan, tipti 70-ti eńsergen jandar bar. Oǵan qosa bul oıyndy jasy 40-tan asqan áıelder de oınaıdy.
Oıyn júrekke paıdaly, aǵzaǵa kóp salmaq túsirmeıdi. Bul oıynnyń áleýmettik mańyzy da joǵary. Júrmeli fýtbol jalǵyzbasty er adamdarǵa syrtqa shyǵyp, qatarlastarymen baılanys ornatýǵa, óz formasyn jaqsartýǵa kómektesti.
Qazaqstanda bul fýtboldy sport belsendisi, pedagog Adambekov Erlan nasıhattaýda. Onyń pikirinshe, osy fýtbol túrine qyzyǵatyn elimizdiń aýdıtorıasy da keń.
Mekenjaıy: Kvochkın atyndaǵy "Qaırat" akademıasy, Ábish Kekilbaıuly kóshesi, 30, 050060/A15K3E4, Almaty, Bostandyq aýdany.
Adambekov Erlan, tel.: +7 701 761 0763.