Maqsat – taýardyń talapqa qanshalyqty saı keletinin tekserý.
Pırotehnıkadan keler qaýip kóp. Byltyrǵy jyldyń ózinde jańajyldyq demalysta qala boıynsha 15 órt jaǵdaıy tirkelgen, dep habarlaıdy Almaty-akshamy.kz Almaty.tv-ge silteme jasap.
«Munyń bári qaýipsizdik erejesin saqtamaýdan», - deıdi mamandar.
Órt oqıǵasy merekede órship ketedi degen tótenshelikter búgin aýdan aýmaǵyndaǵy pırotehnıka satatyn oryndardy aralady. Maqsat – taýardyń talapqa qanshalyqty saı keletinin tekserý. Ókinishtisi, saýdagerler arnaıy ruqsattamanyń jaıyna nazar aýdara bermeıdi, erejeni saqtamaıdy. «Al bul óz kezeginde jaýaptan jaltarýǵa, oqys oqıǵa bola qalsa, basyn alyp qashýǵa sebep», - deıdi mamandar.
«Jyl saıyn qala aýmaǵynda orta eseppen Jańa jyl merekesi kezinde 15 órt oqıǵasy tirkeledi. Onyń 15 paıyzy pırotehnıkalyq ónimderdi qoldaný kezinde oryn alady. Sondyqtan, sońǵy 6 jylda 80 órt boldy, olardyń 10-ynyń shyǵýyna pırotehnıkalyq ónimder sebep bolǵan», – dedi Almaly aýdandyq TJB bas mamany Erbol Álimqul.
Osy jáne ózge de órt qaýipsizdiginiń aldyn alý sharalarymen tanystyrǵan mamandar tekseristiń áli de kúsheıe túsetinin aıtady. Óıtkeni, tilsiz jaýdan zardap shegip, tirkelgenderdiń sany azaımaı tur.
«Kóbinese, órt jaǵdaıy elektr toǵynyń kesirinen bolady. Túngi ýaqytta keıbir jalǵa alýshylar jaryqty óshirmeı tastap ketedi. Osy jaǵdaı boıynsha qazir shara qoldanamyz», – dedi Saýda ortalyǵy órt qaýipsizdigi bólimi basshysynyń orynbasary Tańjaryq Qurmanov.
Jazataıym jaıttan saqtaný úshin qaýipsizdikti saqtaý asa mańyzdy. Mamandar áýelgi kezekte merekelik otshashýdy arnaıy dúkenderden ǵana satyp alýdy usynady.