QR Eńbek jáne halyqty áleýmettik qorǵaý birinshi vıse-mınıstri Aqmádı Sarbasov Almaty qalasyna jumys sapary aıasynda kópir konstrýksıalary zaýytyna jáne birqatar medısınalyq-áleýmettik uıymdarǵa bardy. Eńbek ujymdarymen jáne arnaýly áleýmettik qyzmet alýshylarmen ótkizilgen kezdesýler barysynda ol QR Áleýmettik kodeksiniń jobasynda Memleket basshysynyń tapsyrmalaryn iske asyrý týraly aıtyp berdi.
Aqmádı Sarbasov óziniń jumys saparyn QR EHÁQM Eńbek jáne áleýmettik qorǵaý komıteti Almaty qalasyndaǵy departamentiniń ujymymen kezdesýden bastady, onyń barysynda ol áleýmettik-eńbek salasynda memlekettik qyzmetterdi sapaly kórsetý qajettiligine basa nazar aýdardy.
«Almaty kópir konstrýksıalary zaýyty» JSHS qyzmetkerlerimen kezdesýde vıse-mınıstr qoldanystaǵy eńbek zańnamasynyń ózekti máselelerin talqylady, sondaı-aq halyqty jumyspen qamtý salasyndaǵy jańa saıasat týraly aıtty.
«Halyqty jumyspen qamtýdyń jańa saıasaty azamattardyń jekelegen osal sanattaryn jumyspen qamtýǵa járdemdesýden eńbekke qabiletti azamattardyń barlyq sanattaryn nátıjeli jumyspen qamtý úshin teń bastapqy jaǵdaılar jasaýǵa kóshýdi kózdeıdi. Ol jumys kúshiniń kásibı daǵdylaryn kúsheıtýdi, ıkemdi jumyspen qamtýdyń barlyq túrlerin zańnamalyq bekitý men retteýdi, tehnologıalar men bilim transferti úshin bilikti kadrlardy tartýdy, ishki kóshi – qondy retteýdi, jumyspen qamtý ortalyqtaryn mansaptyq ortalyqtarǵa aınaldyrýdy jáne qyzmetterdi aýqymdy sıfrlandyrýdy kózdeıdi», – dep habarlady Aqmádı Sarbasov.
Ol sondaı-aq kásiporyn men qalalyq eńbek ınspeksıasy qyzmeti ózara memorandýmǵa qol qoıǵanyn aıtty.
«Bul Almatydaǵy úlken zavodtardyń birinde 300-ge jýyq ónim óndiriledi eken. Jumys sapary barysynda zavod qyzmetkerleriniń eńbek jaǵdaıymen tanystyq. Jumys berýshi men qyzmetkerler arasynda qanshalyqty baılanys baryn kórdik. Aıtylǵan kásiporynmen qalalyq eńbek ınspeksıasy qyzmeti arasynda memorandýmǵa qol qoıyldy. Kásiporyn basshylyǵy jumysshylarǵa áleýmettik qoldaý kórsetýge ýáde berdi», – dedi ol.
Sondaı-aq, vıse-mınıstr Almaty qalasynyń áleýmettik qyzmetter úıine baryp, «Belsendi uzaq ómir súrý ortalyǵy» KMM jáne «Alataý» áleýmettik qyzmetter ortalyǵy» KMM medısınalyq-áleýmettik mekemesin aralady. Sapar barysynda A.Sarbasov áleýmettik nysandardyń jumysyn kórip, «Alataý áleýmettik qyzmetter ortalyǵy» bazasynda pılottyq joba retinde iske asqan «NeıroCHat» jobasymen tanysty. Jobanyń jańalyǵy – alǵash ret pasıentterdiń bir-birimen, medısına qyzmetkerlerimen, jaqyn adamdarymen jáne búkil álemmen jelilik baılanysy úshin múmkindik jasalyndy.
«Almaty qalasyna jumys sapary aıasynda birqatar obektilerdi araladyq. Onyń ishinde áleýmettik qyzmetter ortalyqtary jáne belsendi uzaq ómir súrý ortalyqtary bar. Qoldanystaǵy zańnama sheńberinde qajet adamdarǵa arnaıy kómek kórsetiledi. Jalpy elimizde 700 myńdaı múmkindigi shekteýli azamatymyz bar. Sondyqtan basty maqsatymyz osyndaı ortalyqtardy múmkindigi shekteýli adamdardyń talaptaryn eskere otyryp tıimdi ári yńǵaıly etý. Múmkindigi shekteýli adamdar ózderine belgili bir shekteýdiń bar ekenin sezinbeýi kerek. Búgin mundaı ortalyqtardyń qyzmet kórsetýinde biraz jańashyldyq bar ekenin baıqadyq», - dedi QR Eńbek jáne halyqty áleýmettik qorǵaý birinshi vıse-mınıstri Aqmádı Sarbasov.
Aıta ketken jón, Áleýmettik qyzmetter úıinde almatylyqtar «bir tereze» qaǵıdaty boıynsha áleýmettik qyzmetterdiń barlyq spektrin alady. Áleýmettik qyzmetter úıi – elimizdegi biregeı joba. Bir jerde birneshe memlekettik mekemeler – jumyspen qamtý basqarmalary qyzmet kórsetedi: áleýmettik baǵdarlamalar men turǵyn úı saıasaty, halyqty jumyspen qamtý ortalyǵy, Biryńǵaı jınaqtaýshy zeınetaqy qory, «Otbasy banki», «Azamattarǵa arnalǵan úkimet» memlekettik korporasıasy, «Qoldaý» kásipkerlik ortalyǵy, «Atameken» ÓKP jáne áleýmettik saqtandyrý qory. Jalpy, memlekettik qyzmetterdiń 776 túrin alý kózdelgen.
Kún saıyn áleýmettik qyzmetter úıine 500-ge jýyq adam barady. Aǵymdaǵy jyly 99 myńnan astam qyzmet kórsetilgen.
Al «Alataý» áleýmettik qyzmetter ortalyǵy 2022 jyldyń 1 aqpanynda burynǵy «Samal» pansıonatynyń ǵımaratynda ashyldy. Ortalyq 153 tósek-orynǵa eseptelgen. Ortalyqta psıhonevrologıalyq aýrýlary bar 18 jastan asqan múgedektigi bar adamdarǵa arnaýly áleýmettik qyzmetter stasıonarlyq jaǵdaıda kórsetiledi.
