Búgin Almaty qalasynyń «Aınabulaq-2» yqshamaýdanynda Ainabulaq atty jańa shynyqtyrý-saýyqtyrý kesheniniń saltanatty ashylýy ótti. Atalmysh is-sharaǵa Almaty ákiminiń orynbasary Arman Qyryqbaev jáne qalalyq sport basqarmasynyń basshysy Erden Haırýllın qatysty. A.Qyryqbaev ashylý saltanaty kezinde sóz sóılep, Jetisý aýdanynyń turǵyndary men sportsúıer qaýym aldynda jańa keshenniń ashylýyna baılanysty jyly lebizin bildirdi:
- Barshańyzdy Almaty qalasynyń basshysy atynan úlken ulttyq mereke Respýblıka kúnimen shyn júrekten quttyqtaımyz! Bári tuspa tus kelip turǵan kúni Jetisý aýdanynda bıyl jańa sport kesheniniń ashylýynda ekinshi ret bas qosyp otyrmyz. Sport keshenine kelgen adamdardyń kóptigine qarap, bul jerdegi úıirmeler qala turǵyndary arasynda suranysqa ıe ekenine kózimiz jetti. Áli de úlken josparlarymyz bar. 2030-jylǵa deıingi aralyqta jyl saıyn kem degende 3 sport keshenin ashýdy josparlap otyrmyz. Búgingi bolatyn saıystarda shyn myqtylar jeńiske jetsin, – dedi Almaty ákiminiń orynbasary Arman Qyryqbaev.
Sport kesheni balalarǵa buqaralyq sportpen aınalysýǵa múmkindik ashý jáne olardy salýatty ómir saltyna baýlý maqsatynda salyndy. Keshenniń jalpy aýdany – 3900 sharshy metr. Munda bir kúnde Almaty qalasy sport basqarmasyna qarasty 82 kásibı jattyqtyrýshysynyń basshylyǵymen 17 sport túrinen 900 jas sportshy qatysa alady.
- Búgin jańa sport kesheni ashylyp jatyr. Bul jastar úshin óte úlken múmkindik. Olardy shyńdap, ózderin bıik deńgeıde kórsetýge múmkindik beretin ortalyq. Sondyqtan barlyǵyn sportpen aınalysýǵa shaqyramyn, sport – densaýlyq kepili, – dedi qoıan-qoltyq urys túrinen úıirme qatysýshysy Shynar Kenjebaeva.
Ainabulaq shynyqtyrý-saýyqtyrý kesheninde basketbol, fýtzal, voleıbol, toǵyzqumalaq, qazaqsha kúres, sambo, mýaıtaı jáne kıkboksıń seksıalary men ózge de sport túrleri boıynsha úıirmeler ashylady. Aıta ketken jón, bul sport kesheni tek oqý-jattyǵý prosesine ǵana emes, sonymen qatar qalalyq jáne respýblıkalyq týrnırlerdi uıymdastyrýǵa jáne ótkizýge arnalǵan.
Saltanatty ashylý saltanatynan keıin boz kilemde ártúrli sport sheberleri óz ónerlerin kórsetti. Sondaı-aq, sport úıirmeleriniń ókilderi barlyq nıet bildirgen balalardy jazyp alyp, qabyldaý júrgizdi.