QR Táýelsizdik kúnine oraı gúl shoqtaryn qoıý rásimine Erbolat Dosaev qatysty
16 jeltoqsanda qazaqstandyqtar Táýelsizdik kúniniń 32 jyldyǵyn atap ótýde. Almatyda qala ákimi Erbolat Dosaevtyń, máslıhat depýtattary, Ardagerler keńesi, Qoǵamdyq keńes músheleri, 1986 Jylǵy Jeltoqsan oqıǵalaryna qatysýshylardyń, Aýǵan soǵysy ardagerleri, Qazaqstan halqy Assambleıasy músheleri men etnomádenı birlestikter, qalanyń jastar uıymdary ókilderiniń qatysýymen «Táýelsizdik» monýmentine gúl shoqtaryn qoıý rásimi ótti.
Saltanatty rásim barysynda qatysýshylar jeltoqsanshylardy metronomnyń únimen bir mınýt únsizdikpen eske aldy.
Saltanatty rásim Almaty óńirlik garnızonynyń áskerı-úrmeli orkestri men sarbazdarynyń memlekettik ánurandy oryndaýymen aıaqtaldy.
«Barlyq qazaqstandyqtardy Táýelsizdik kúnimen quttyqtaımyn. Biz Táýelsizdikke qalaı qol jetkizgendigimiz týraly árdaıym este saqtap, keler jas urpaqqa jetkizýimiz kerek. Beıbit zamanda ómir súrip jatqan jastarǵa aıtarym: bilim alyńyzdar, sportpen shuǵyldanyp, ortaq úıimiz – Qazaqstandy birge kórkeıteıik», - dedi Jeltoqsan oqıǵasynyń ardageri, «Órshil rýh» qoǵamdyq birlestiginiń basshysy Serik Muhametalın.
«Jyl saıyn osynda kelý men úshin úlken mártebe. Ótkeni men 1986 jyly osynda boldym. Munyń bári meniń kóz aldymda ótti. Men úshin bul qasıetti mereke, qasıetti kún. Bul eske alý kúni. Táýelsizdiktiń 32 jylynda biz barlyq salada kóp nársege qol jetkizdik. Álemdik arenadaǵa tanylý, dıplomatıalyq jáne ekonomıkalyq deńgeıde tanylý. Biz Ortalyq Azıadaǵy Ortalyq ekonomıkalyq draıvermiz. Bul kún 1986 jyly alǵash ret Táýelsizdik týraly oılaǵanymyzben qundy», - dep atap ótti Qoǵamdyq keńestiń múshesi, jazýshy, Jazýshylar odaǵynyń múshesi Beknur Kısıkov.
Esterińizge sala keteıik, qazirgi ýaqytta Almatyda 1986 jyly jeltoqsan oqıǵalaryna qatysqan 670 adam turady. Bıyl Almatyda Jeltoqsan oqıǵasyna qatysýshylarǵa birjolǵy tólem 150 myń teńgeden 250 myń teńgege deıin ulǵaıtyldy.
Táýelsizdik kúnine oraı «Táýelsizdik tańy» monýmentine gúl shoqtaryn qoıý rásimi 17 jeltoqsan kúni saǵat 11:00-de ótedi.