Respýblıka saraıynda Parlament Senatynyń Tóraǵasy Máýlen Áshimbaev pen Almaty ákimi Baqytjan Saǵyntaevtyń qatysýymen «Almaty – Táýelsizdiktiń altyn besigi» atty saltanatty shara ótti
Bul kúni memlekettik nagradalar qoǵam qaıratkerlerine, Jeltoqsan uıymdarynyń basshylaryna, memlekettik qyzmetshilerge, ǵylym men óner qaıratkerlerine tapsyryldy, dep habarlaıdy Almaty-akshamy.kz
Táýelsizdik kúni elimizdiń, qalanyń jáne árbir almatylyqtyń barlyq jetistikteri men tabystaryn qamtıdy. Bul týraly qala ákimi Baqytjan Saǵyntaev óziniń quttyqtaý sózinde aıtty. Resmı bólimdi ashqan Almaty ákimi tarıhı turǵydan Táýelsizdiktiń besigine aınalǵan megapolıstiń erekshe rólin atap ótti. Dál osy jerde 1991 jyldyń 16 jeltoqsanynda Qazaqstan Respýblıkasynyń egemendigi resmı túrde jarıalandy, munda táýelsiz memlekettiń negizin qalaýshy qujattar qabyldandy.
«Almatyda el úshin mańyzdy sheshimder qabyldandy, Konstıtýsıa, memlekettik rámizder qabyldandy, Qarýly Kúshter quryldy, ulttyq valúta engizildi. Tuńǵysh Prezıdent saılaýynyń jalpyhalyqtyq nátıjeleri de Almatyda jarıalandy. 1998 jyly Tuńǵysh Prezıdent «Almatynyń erekshe mártebesi týraly» zańǵa qol qoıdy», - dedi Baqytjan Saǵyntaev jáne Elbasynyń «Almatyny Táýelsizdiktiń altyn besigi» degenin atap ótti.
«El Prezıdenti Qasym-Jomart Toqaev sol qaıǵyly oqıǵalardan keıin týra bes jyl ótken soń Táýelsizdik jarıalanǵanyn aıtty. Biz Jeltoqsan batyrlarynyń qaharmandyǵy men erligin laıyqty baǵalap, jan-jaqty dáripteýimiz kerek. Olar - osy erkindiktiń alǵashqy qarlyǵashtary, Jeltoqsannyń keıipkerleri. Al Elbasy óziniń «Táýelsizdik taǵylymy» atty maqalasynda osydan 30 jyl buryn halqymyz bostandyq paıdasyna tańdaý jasaǵanyn aıtqan bolatyn», - dep eske saldy B. Saǵyntaev.
Qala ákimi almatylyqtardyń, ásirese, aǵa býynnyń megapolısti damytýǵa qosqan úlesin atap ótti.
«Qazaqstan Táýelsizdiginiń 30 jyldyq mereıtoıy – bizdiń árqaısymyz úshin mańyzdy oqıǵa. Osy jyldar ishinde ulttyq rýh nyǵaıdy, urpaqtar sabaqtastyǵy damydy, qazirgi tarıh paıda boldy. Búgin biz «Máńgilik El» jalpyulttyq birlik, beıbitshilik pen kelisim ıdeıasyn ustana otyryp, memleket quryp jatyrmyz. Biz Táýelsizdikti armandaǵan ata-babalarymyz salǵan jolmen kelemiz», - dedi Baqytjan Saǵyntaev ári elimizdiń Táýelsizdigin qalyptastyrýǵa qatysqan qala turǵyndarynyń eren eńbekterine alǵysyn bildirdi.
Senat Tóraǵasy Máýlen Áshimbaev El Prezıdentiniń tapsyrmasy boıynsha Táýelsizdiktiń 30 jyldyǵyna arnalǵan saltanatty is-sharaǵa qatysty. Qala turǵyndary aldynda sóılegen sózinde ol Qazaqstan Táýelsizdik jyldarynda óziniń memlekettiligin qalyptastyrǵanyn jáne memlekettik shekarany halyqaralyq-quqyqtyq resimdeýdi júrgizgenin aıtty. Senat Tóraǵasy Tuńǵysh Prezıdent – Elbasy Nursultan Nazarbaevtyń saıasatynyń arqasynda elimiz halyqaralyq qoǵamdastyqtyń tolyqqandy jáne yqpaldy múshesine aınalǵanyn, jańa astana salynǵanyn, elimizdiń óńirleri de qarqyndy damyǵanyn atap ótti.
«Táýelsizdik jyldarynda Almaty damýǵa aıtarlyqtaı serpin aldy. Búginde bul - tek Qazaqstannyń ǵana emes, búkil postsovettik keńistiktiń eń serpindi damyp kele jatqan jáne ekonomıkalyq qýatty qalalarynyń biri. Elimizdegi árbir besinshi kásipker Almatyda jumys isteıdi», - dedi Máýlen Áshimbaev.
Spıkerdiń aıtýynsha, Almatyda sapaly adamı kapıtal shoǵyrlanǵan.
«Munda bolashaq ekonomıkasynyń «jańǵyrtý ózegi»: kreatıvti tap pen belsendi azamattyq qoǵam qalyptasty. Megapolıske elimizdiń ár óńirinen talanttar aǵylyp kelip jatyr. Almaty – ǵylymı-zertteý jáne tájirıbelik-konstrýktorlyq jumystarǵa ınvestısıalar boıynsha kóshbasshy. Memleket basshysy atap ótkendeı, Almatynyń kreatıvti ekonomıkany damytý jónindegi tájirıbesin búkil elge taratý qajet», - dedi Máýlen Áshimbaev.
Saltanatty shara barysynda Máýlen Áshimbaev pen Baqytjan Saǵyntaev Prezıdenttiń atynan el men qalanyń damýyna erekshe úles qosqan almatylyqtarǵa memlekettik nagradalardy tapsyrdy.
Máselen, Qazaqstan Jazýshylar odaǵynyń tóraǵasy Ulyqbek Esdáýlet İİİ dárejeli «Barys» ordenimen marapattaldy, Eńbek ardageri Q.Baıkenovke, Almaty qalasy boıynsha SEBD basshysy J. Bekshınge «Parasat» ordeni, İ dárejeli «Dostyq» ordeni KIMEP ýnıversıtetiniń rektory Ch.I. Bengke tapsyryldy. Memlekettik nagradalarmen ǵylym men bilim, mádenıet jáne densaýlyq saqtaý qaıratkerleri, memlekettik qyzmetkerler men qalanyń tynys-tirshiligin qamtamasyz etetin qurylys kompanıalary men uıymdarynyń qyzmetkerleri marapattaldy.