Agrohımıa alybyna – eskertkish taqta
Qazaq Ó.O.Ospanov atyndaǵy Qazaq topyraqtaný jáne agrohımıa ǵylymı-zertteý ınstıtýtynyń qabyrǵasyna osy ǵylymı-zertteý mekemesin 17 jyl basqarǵan kórnekti ǵalym, UǴA akademıgi, aýyl sharýashylyǵy ǵylymdarynyń doktory, profesor, marqum Abdýlla Saparuly Saparovtyń qurmetine eskertkish taqta ornatyldy. Bul týraly jýrnalıs Marat Baıdildáuly facebook-tegi paraqshasyna jazdy, dep habarlaıdy Almaty-akshamy.kz.
Taqtanyń ashylý lentasyn akademık Ǵanı Qalıev, agroýnıversıtet prorektory Esenbaı Islamov qıdy.
Saltanatta sóz alýshylar Abdýlla Saparulynyń ǵylymdaǵy jemisti eńbek joly týraly baıandady. 2003 jyly ǵylymı-zertteý mekemesi qarjy tapshylyǵynan turalap, jabylýǵa shaq qalǵan tusta basshylyqqa kelgen Abdýlla Saparuly óziniń iskerliginiń, istiń yǵyn taba biletin uıymdastyrýshylyq qabiletiniń arqasynda ınstıtýtty daǵdarysty ahýaldan alyp shyqty. Basqarýǵa alǵan kezinde óndiristiń birneshe mıllıon teńge qaryzy bolǵan bolsa, 10 aıdyń ishinde, ǵylymı jańalyqtardy óndiriske engizýdiń arqasynda 45 mıllıon tenge tabys kirgizgen.
Ol qysqa merzimde topyraq resýrstary men aýyl sharýashylyǵy maqsatyndaǵy jerlerdi tıimdi paıdalaný men topyraqtyń qunarlylyǵyn basqarý júıesiniń úılestirýshisine, topyraqtaný jáne agrohımıa ǵylymdary damýynyń uıymdastyrýshysyna ári bas menedjerine aınaldy. Sheteldik ınvestorlar tarta bildi. «Ortalyq Azıanyń qurǵaq jerlerindegi ekojúıege klımattyń ózgerýiniń áserin zertteý» taqyryby boıynsha Qazaqstan – Qytaı halyqaralyq jobasynyń teń jetekshisiniń biri boldy.
Ǵalym aýyl sharýashylyǵy maqsatynda paıdalanatyn jerlerdi tıimdi paıdalaný jáne topyraqtyń qunarlylyǵyn arttyrýdyń negizinde aýyl sharýashylyǵy daqyldarynyń ónimdiligi men sapasyn arttyrý jáne óndiriske jańa ınovasıalyq tehnologıalardy endirý problemalarymen jemisti aınalysty. A.Saparovtyń jetekshiligimen agrarlyq bilim berý jáne ǵylym aıasynda qyzmet atqaryp júrgen jetekshi mamandardyń 7 kandıdattyq, 5 doktorlyq jáne 10 magıstrlik, 2 RhD doktorlyq dısertasıasy qorǵaldy. Ol zamandastary arasynda «Agrohımıa salasynyń alyby» atandy,-dep jazdy ol.
Akademık A.Saparovtyń 500-ge jýyq ǵylymı jumysy jarıalanǵan. Onyń ishinde 20 monografıa, kitap pen oqý quraly, 25 óndiristik usynys, 15 ınovasıalyq patent, 8 avtorlyq kýálik, 3 avtorlyq quqyǵy bar.
Abdýlla Saparov ǵylymı-óndiristik, pedagogıkalyq qyzmetimen birge qoǵamdyq jumystarǵa kóp kóńil bóletin. Ol 15 jyldaı jergilikti organdardyń halyq depýtattarynyń bes shaqyrylymynda depýtattyqqa saılanǵany taǵy bar. Ekeýmiz túıdes qurdas ári dos edik. Óziniń qarapaıym, janashyr minezimen aınalasyndaǵylardyń júregin jaýlap alatyn. Oı-josparlarymen bólisip, aldyna bıik maqsattar qoıatyn.
Ábekeń jubaıy Ulbúbi ekeýi úsh perzent tárbıelep ósirdi. Saltanatty jıynda jurtshylyqqa Abdýlla Saparov týraly derekti fılm usynyldy.
