Mashınanyń sanyn 100-ge deıin kóbeıtý josparlandy
Qalada 20 myńnan asa kembaǵal jan bolsa, sonyń tek 5 myńǵa jýyǵy ǵana arnaıy avtokólikterdi qoldana alady. Almatyda múmkindigi shekteýli jandardy tasıtyn arnaıy kólikter jetispeıdi. Invataksıdiń kómegine júginý úshin erekshe qajettiligi bar adamdar birneshe kún buryn tapsyrys berip, kezekke turýǵa májbúr, dep habarlaıdy Almaty-akshamy.kz Almaty.tv-ge silteme jasap.
Qalada 20 myńnan asa kembaǵal jan bolsa, sonyń tek 5 myńǵa jýyǵy ǵana arnaıy avtokólikterdi qoldana alady. Múmkindigi shekteýli jandardyń túıtkilderin ylǵı kóterip júretin Ulan İńkárbekov ınvataksıdiń qyzmetine óte sırek júginem deıdi. Óıtkeni arnaıy kólikterge qol jetkizý qıyn. Sózinshe mashınalar eń aldymen jumys isteıtin, oqýǵa baratyn jandarǵa qyzmet kórsetedi.
«Jumys isteıtin adamdardy kúnde tegin aparyp, alyp ketedi. Mashınanyń jetispeýshiliginen jumys istemeıtin, oqymaıtyndardar qoldana almaıdy. Eger qonaqqa nemese basqa jaqqa barý kerek bolsa, kóliktiń bosaǵanyń kútýge májbúr», – dedi Bostandyq aýdandyq múgedekter qoǵamynyń tóraǵasy Ulan İńkárbekov.
«Tańǵy 7:00-den keshki 19:00-ge deıin júremiz. Túski as ishpeımiz. Óıtkeni balalar úlgerý kerek. Bireýi emge barady, bireýi emnen qaıtady. Jyldam júrý úshin biz radar qoldanamyz. Sebebei tez jetpesek anasy men balasy qınalyp qalady», – dedi «Invataksı» arnaıy avtokóliginiń júrgizýshisi Jumadil Baınazarov.
Bul máseleni salaǵa jaýapty mamandar jaqsy biledi. Túıtkildi sheshý úshin bıyl Almaty ákimdigi ınvataksılerdi eki esege kóbeıtpek. Búginde múmkindigi shekteýli jandardy tegin tasymaldaıtyn 46 arnaıy kólik bolsa, endi onyń sany 100-ge deıin artady.
«Invataksı boıynsha bizde qalada jetkilikti qarajat bólingen. 46 avtokólik bar bolsa, qala ákiminiń qoldaýymen jáne máslıhatqa da shyǵardyq. Bizde 100 mashınaǵa deıin jetkizý, jaqyn arada konkýrs uıymdastyrylady. Mashınanyń sanyn 100-ge deıin kóbeıtýdi josparlap otyrmyz», – dedi Jumyspen qamtý jáne áleýmettik baǵdarlamalar basqarmasy basshysynyń orynbasary Danıar Álkebaıuly.
Osy maqsatta qala qazynasynan bıyl 244 mln teńge bólinipti. Ulan İńkárbekov bul kembaǵal jandarǵa tamshydaı bolsa da kómek bolatynyn aıtady.
«Eki ese kóbeıse, bul búkil máseleni sheshpese de, jaqsy bolar edi. Árbir 10 mashınaǵa arnaıy taksoparkter bar. Ol da óz qarajatyna shaqyryp baryp kelgenge kómek bolady», – dedi Bostandyq aýdandyq múgedekter qoǵamynyń tóraǵasy Ulan İńkárbekov.
Qazir qalada 20 myńnan asa azamat júrip-turý qabiletinen aıyrylǵan. Búginde sonyń tek 5 myńǵa jýyǵy arnaıy kólikterdi qoldana alady. Jyl basynan beri ınvataksı qyzmeti 58 myńnan asa sapar jasapty.