Balalar amandyǵynyń ındeksi qabyldandy
Áleýmettik jelilerdegi jarıalanymdardan depressıa belgilerin anyqtaıtyn jasandy ıntellektini paıdalaný qajet. Oqý-aǵartý mınıstrliginiń ókili Prezıdent janyndaǵy Áıelder isteri jáne otbasylyq-demografıalyq saıasat jónindegi ulttyq komısıanyń otyrysynda osyndaı usynys bildirdi, dep habarlaıdy Almaty-akshamy.kz QazAqparat-qa silteme jasap.
Kún tártibindegi negizgi máselelerdiń biri – kámeletke tolmaǵandar arasynda sýısıdtiń aldyn alý. Ulttyq komısıanyń tóraıymy, Prezıdent Ákimshiligi basshysynyń orynbasary Aıda Balaeva balalar men jasóspirimder arasyndaǵy sýısıd – qoǵamdaǵy eń ózekti áleýmettik problemanyń biri bolyp otyrǵanyn atap ótti. Aldyn alý sharalary keshenin qalyptastyrýdyń jańa tásilderin izdeý qajettigine toqtaldy. Kóptegen sarapshylardyń pikirinshe, sýısıdtiń kóbeıýine psıhologtardyń, táýekel tobyndaǵy balalarmen jumys jasaıtyn mamandardyń biliktiligi men daıyndyq deńgeıiniń jetkiliksizdigi yqpal etedi. Osyǵan baılanysty Oqý-aǵartý mınıstrligi memlekettik vedomstvolardyń, jergilikti atqarýshy organdardyń jáne barlyq steıkholderlerdiń problemalardy sheshýdegi kúsh-jigerin biriktirýdi usyndy.
«Mınıstrlik áleýmettik jelilerdiń ashyq jarıalanymdarynda depressıanyń belgilerin anyqtaıtyn jasandy ıntellektini paıdalanatyn pılottyq jobany iske qosýdy josparlap otyr», - dep atap ótti Oqý-aǵartý vıse-mınıstri Ǵanı Beısembaev.
Otyrysta Memleket basshysynyń tapsyrmasy aıasynda alǵash ret Balany qýdalaýdyń (býllıngtiń) aldyn alý qaǵıdalary ázirlenip, ınternet jelisindegi zańsyz kontentke qarsy is-qımyl jónindegi normalar engizilgeni atalyp ótti. Balalar amandyǵynyń ındeksi qabyldandy, ol balalardyń quqyqtary men múddelerine, onyń ishinde psıhologıalyq saýlyǵyna júıeli monıtorıń júrgizýge múmkindik beredi. Bas prokýrordyń orynbasary Jandos Ómirálıev óz baıandamasynda kámeletke tolmaǵandardyń sýısıdteri jónindegi isterdi tergeýdi qadaǵalaý kúsheıtilgenin atap ótti. Bul birinshi jarty jylda óz-ózine qol jumsaý jaǵdaılarynyń (38,1%-ǵa) jáne olardyń áreketteriniń (5,7%-ǵa) tómendeýine yqpal etken. Aıta ketsek, 2021 jyly kámeletke tolmaǵandar arasynda sýısıd jasaý men ony jasaýǵa árekettený jaǵdaılarynyń 21,5%-ǵa óskeni baıqalǵan. İshki ister mınıstrligi Ákimshilik polısıa komıtetiniń tóraǵasy Atyǵaı Arystanov bilim berý uıymdarynda kámeletke tolmaǵandar arasynda sýısıdtik kórinisterdi erte anyqtaý ádistemesin jetildirýdi, sondaı-aq sýısıdologtardyń sanyn arttyrý máselesin qarastyrýdy usyndy. Ulttyq komısıanyń múshesi, advokat, «AU» onlaın-quqyqtyq mektebiniń negizin qalaýshy Aıman Omarova bastaýysh synyptarda «Meniń qaýipsizdigim» pánin, al ata-analar men muǵalimder úshin arnaıy baǵdarlamalar engizýdi usyndy. Sondaı-aq, spıkerler dıagnostıkalyq jáne psıhoterapıalyq qyzmetter kórsetetin medısınalyq kabınetter jelisin keńeıtýdi, jergilikti atqarýshy organdarǵa bilim berý uıymdarynyń qyzmetin baǵalaýdyń krıterıılerin psıhologtardyń tıimdi qyzmetine áser etetindeı etip qaıta qaraýdy usyndy.