Qaladaǵy SHOB nysandarynyń ishinde azyq-túlik emes dúkender eń kóp zardap shekti. Bul týraly Baqytjan Saǵyntaevtyń tóraǵalyǵymen ótken Almaty qalasynyń tynys-tirshiligin qalpyna keltirý jónindegi qalalyq shtab otyrysynda ákimniń orynbasary İlıas Óserov málimdedi, dep habarlaıdy Almaty-akshamy.kz
Almaty ákiminiń tapsyrmasy boıynsha zalaldy baǵalaý jónindegi qalalyq jáne aýdandyq komısıalar qurylyp, jumys istep jatqany belgili. Komısıa jumysyna is júzinde barlyq qyzmetter men uıymdar, sonyń ishinde «Atameken», táýelsiz baǵalaýshylar men aýdıtorlar palatasynyń ókilderi tartylǵan.
Aldyn ala derekter boıynsha (14.01.2022 jylǵy jaǵdaı boıynsha) múliktiń barlyq túrleri boıynsha zalaldyń jalpy somasy 112 mlrd teńgeden astam (~112,6 mlrd), onyń ishinde:
bıznes sýbektileri boıynsha 67 mlrd (SHOB – 42 mlrd, iri bıznes – 25 mlrd).Almaty ákiminiń orynbasary atap ótkendeı, SHOB arasynda azyq-túlik emes dúkender – 20,9 mlrd, azyq-túlik dúkenderi – 5,7 mlrd, qarý-jaraq dúkenderi – 6,4 mlrd, lombardtar - 2,9 mlrd, qoǵamdyq tamaqtaný obektileri – 1,8 mlrd jáne t.b. zardap shekti.
Qarjy uıymdary boıynsha (bank bólimsheleri, bankomattar) aldyn ala zalal 701,7 mln qurady, Qarjy naryǵyn retteý jáne damytý agenttigi ekinshi deńgeıdegi banktermen birlesip, zardap shekken obektiler boıynsha derekterdi jınaýdy jalǵastyrýda. Biz jaqyn kúnderi agenttikten málimetter alamyz dep kútýdemiz.
İri bıznes boıynsha shyǵyn shamamen 25 mlrd.
Budan basqa, janar-jaǵarmaı quıý beketteri 306 mln teńgege, basqa nysandar – 3,1 mlrd teńgege zardap shekti.
«20 ákimshilik ǵımarat, polısıa departamentiniń 10 beketi, 17 ekopost pen áýejaı ǵımaraty boıynsha shyǵyn 22,6 mlrd teńgeden asady», - dep atap ótti Almaty ákiminiń orynbasary.
Atap aıtqanda, ákimdik ǵımaratynyń shyǵyny 20 mlrd; Bas prokýratýranyń Arnaıy esep basqarmasynyń ǵımaraty 2 mlrd; polısıa departamenti men aýdandyq basqarmalardyń ǵımarattary men beketteri 205 mln; 162,7 mln-ǵa 17 ekopost; medısınalyq nysandar – 2,1 mln jáne t.b.