«Ǵumyr-darıa» atty shyǵarmashylyq keshi ótti.
Qazaqstannyń Eńbek Eri, Halyq jazýshysy Muhtar Shahanov 80 jasta. Mereıtoı aıasynda Almatynyń Respýblıka saraıynda aqynnyń «Ǵumyr-darıa» atty shyǵarmashylyq keshi ótti, dep habarlaıdy Almaty-akshamy.kz Almaty.tv silteme jasap.
Ónegeli ómirin shyǵarmashylyqqa arnaǵan ult qaıratkeri - el men jer máselesinde ózekti oıyn aıtyp júrgen dara tulǵa. Otandyq televızıa, radıo salasynda etken eńbegi eren. Shyǵarmashylyq keshte zamandastary men ádebıet alyptary arnaıy qonaq boldy. Qala ákiminiń orynbasary Arman Qyryqbaev aqyndy mereıtoıymen quttyqtap, ádebıet salasy men el damýyna qosqan eńbegin erekshe atap ótti. Qazaqy dástúrge saı ıyǵyna shapan japty.
«Búkil qazaq eliniń toıy dep oılaımyn, osyndaı azamattardy qazaq halqy alaqanyna salyp ósirý kerek. 80 jasqa 80 qosylsyn. Olaı aıta beremiz ǵoı, biraq 80 túıelik júkti moınyna salyp, kóterip, halqynyń aldynda, eliniń, tiliniń aldynda ary taza», – dedi jazýshy, dramatýrg Dýlat Isabekov.
Qazaq poezıasynda dara qoltańbasymen aıshyqtalǵan jyr alybynyń esimi elimizde ǵana emes, shet memlekette de asa tanymal. Onyń shyǵarmalary 25-ten astam memlekettiń mektep ádebıetine endi. Buǵan deıin Germanıada Shahanov týraly 400-deı maqala shyqty. Japonıada 6 mln tırajben shyǵatyn gazette shyǵarmalary jarıalandy. Shyǵarmashylyq keshte aqynnyń sózine jazylǵan ánder shyrqalyp, dramalyq qoıylymdar kórsetildi.
«Muhańnyń ózindik stıli, ózindik sóz qoldanysy, qazaqtyń rýhanı tereń boılap jazady. Sózderi mándi de mańyzdy. Sondyqtan ol ánge keledi. Sózi maǵynaly bolsa, áni áýendi bolsa, oryndaýshy ultjandy bolsa, sonda ǵana ol el arasyna taraıdy», – dedi Qazaqstannyń eńbek sińirgen qaıratkeri Asyly Osman.