Almatyda «Mereıli otbasy» ulttyq konkýrsynyń qalalyq kezeńi jeńimpazdaryn saltanatty marapattaý rásimi ótti.
Sońǵy jyldary elimizde otbasylyq qundylyqtardy memlekettik deńgeıde jandandyryp, úlgili otbasylardy nasıhattaý jumystary qolǵa alyndy. Osy maqsatta 2013 jyly qyrkúıek aıynyń ekinshi jeksenbisi otbasy kúni bolyp belgilenip, 2014 jyldan bastap «Mereıli otbasy» ulttyq konkýrs bastaý aldy, dep habarlaıdy Almaty-akshamy.kz.
Qoǵam nazaryn otbasylyq qundylyqtardy saqtaýǵa aýdarý ári ony dáripteý maqsatynda elimizde ár jyl saıyn «Mereıli otbasy» ulttyq konkýrsyn ótkizý dástúrge aınaldy.
«Mereıli otbasy» ulttyq konkýrsy jyl saıynǵy dástúr boıynsha Halyqaralyq otbasy kúnine oraı 15 mamyrda bastaý alǵan bolatyn.
Bul rette, «Mereıli otbasy» ulttyq konkýrsyn Almaty qalasynda uıymdastyrý maqsatynda Qalalyq komısıanyń quramy bekitildi.
Komısıa quramyna qala ákimi men qala ákiminiń orynbasary, Qoǵamdyq damý, Mádenıet, Jastar saıasaty, Jumyspen qamtý jáne áleýmettik baǵdarlamalar basqarma basshylary, Almaty qalasy ákiminiń apparaty áleýmettik damý bóliminiń bas ınspektory – Almaty qalasy ákiminiń janyndaǵy Áıelder isteri jáne otbasylyq-demografıalyq saıasat jónindegi komısıanyń hatshysy, úkimettik emes uıymdardyń ókilderi, máslıhat depýtaty, Almaty qalasy Qoǵamdyq keńesiniń múshesi, sonymen qatar, konkýrstyń ótken jylǵy jeńimpazy da endi.
«Mereıli otbasy» konkýrsy, eń aldymen adamgershilik murattardy jańǵyrtýǵa, otbasy men nekeniń mártebesin kóterýge, ata-ananyń bala tárbıesindegi jaýapkershiligin arttyrýǵa, otbasylyq qundylyqtar men otbasynyń jaǵymdy ımıjin qalyptastyrýǵa jáne keńinen nasıhattaýǵa baǵyttalǵan.
«Almaty qalasynda dástúrli «Mereıli otbasy» ulttyq konkýrsyna mamyr-shilde aralyǵynda ótinimder qabyldandy. Shildeniń 1-10 aralyǵynda aýdandyq komısıa quramy ótinimderdi qarap, úzdik shyqqan 2 otbasyny qalalyq komısıanyń qaraýyna jiberdi. 14 shildede «Mereıli otbasy» ulttyq konkýrsynyń Almaty qalasy boıynsha jeńimpazdardy anyqtaý jónindegi komısıasynyń otyrysy ótti. Qalanyń 200-den asa otbasy konkýrsqa qatysýǵa nıet bildirgen.
Komısıa qalalyq kezeńge aýdandardan 8 otbasyn jáne olardyń arasynan 1 otbasyn Almaty qalasy atynan respýblıkalyq kezeńge qatysýǵa tańdady. Búgin osy merekege qatysqan otbasylardyń ókilderi óz ómirlerin bolashaq urpaqty tárbıeleýge, otbasylyq baılanystardy nyǵaıtýǵa arnady. Olardyń júrekteri týystary men jaqyndaryna, óz Otanyna degen súıispenshilikke toly. Ár otbasy óz shejiresin daıyndap, beınebaıanda olar óz tarıhyn, jetistikterin aıtyp berdi.», - deıdi uıymdastyrýshy Halyqaralyq «Janashyr» qoǵamdyq qorynyń prezıdenti Jańyl Ápetova.
Qala ortalyǵyndaǵy «Baqyt» saltanat saraıynda ótken saltanatty marapattaý rásiminde Almaty qalasy Qoǵamdyq damý basqarmasy basshysynyń orynbasary Bekbergenov Renat Oraluly Almatynyń 8 aýdanynan «Mereıli otbasy» ulttyq konkýrsynda ozyq shyqqan segiz otbasyna 300 000 (úsh júz myń) teńgeniń Sertıfıkattary men Dıplomdaryn tabys etti.
QR tuńǵysh Eńbek eri, Qazaqstannyń eńbek sińirgen qaıratkeri, Qazaqstan Pedagogıkalyq Ǵylymdar Akademıasynyń Akademıgi, Almaty qalasynyń Qurmetti azamaty Aıagúl Tóreqyzy Mırazova konkýrstyń respýblıkalyq kezeńine ótken jeńimpaz Sybanbekovter otbasyna 700 000 (jeti júz myń) teńgeniń sertıfıkaty men Dıplomyn tabys etti.
«Jyl saıyn «Mereıli otbasy» konkýrsyn ótkizý – jaqsy dástúr. Óte tolqynysty sát. Ýaqytty qyzyqty ótkizý múmkindigin syılaǵan uıymdastyrýshylarǵa rahmet aıtqym keledi. Bereke-birligi jarasqan, sanaly urpaq tárbıelep, el demografıasyna úles qosyp otyrǵan otbasylardy dáripteý kerek, ózgelerge úlgi etý kerek. «El bolamyn deseń – besigińdi túze» deıdi, otbasy tárbıesi óte mańyzdy másele. Uly Otan soǵysynan oralǵan ákem men anamyz ekeýi 8 balasyna laıyqty tárbıe berdi. Urpaq sabaqtastyǵyn jalǵap, biz de balalarymyzdy elge qyzmet etetin azamattar etip tárbıeleýdemiz», - deıdi konkýrsqa Naýryzbaı aýdanynan qatysýshy Ardaq Maýythanuly Sydyq.
Iá, ár otbasynyń bosaǵasynyń beriktigi – memleket irgetasynyń kemeldiginiń kepili bolmaq. Baqytty otbasy - úılesimdi qoǵamnyń jáne memlekettiń senimdi tireginiń basty quramdas bóligi.
Bıyl «Mereıli otbasy» ulttyq konkýrsyna 10 jyl tolyp otyr. İs-shara merekelik konsertpen aıaqtaldy.
«Mereıli otbasy» ulttyq konkýrsyn Almaty qalasy Qoǵamdyq damý basqarmasynyń qoldaýymen Halyqaralyq «Janashyr» qoǵamdyq qory uıymdastyrdy.