Almaty qalasynyń ókili Rızabek Aıtmuhan 92 kg salmaqta úzdik atandy
Almaty qalasyndaǵy Balýan Sholaq atyndaǵy sport saraıynda kúres túrlerinen Qazaqstan VI jazǵy spartakıadasy máresine jetti, dep habarlaıdy Almaty-akshamy.kz QazAqparatqa silteme jasap.
Balýandardan eń sońǵy bolyp erkin kúres sheberleri medaldardy sarapqa saldy.
Keshe jambyldyqtar Rahat Qaljan men Sanjar Muhtar 57 jáne 65 kg salmaqta top jardy. 74 kg salmaqta fınalda 2016 jyly qazaq balýandary arasynda alǵash ret álem chempıonatynyń kúmis júldegeri atanǵan BQO-nyń týmasy, bul joly Astana atynan kilemge shyqqan Nurlan Bekjanovty utqan shymkenttik Darhan Esenǵalı úzdik shyqty. Osy salmaqta álem chempıonatynyń júldegerleri Nurǵoja Qaıpanov pen Danıar Qaısanovtyń medalsyz qalýy básekelestiktiń kúsheıe túskenin kórsetkendeı.
Sondaı-aq shyǵysqazaqstandyq Azamat Dáýletbekov 86 kg, astanalyq Bekzat Úrkimbaı 97 kg salmaqta jeńis tuǵyryna kóterildi.
Búgin jalǵasqan dodada túrkistandyq Nurbolat Ábdýálıev 61 kg, astanalyq Sanjar Dostanov 70 kg, atyraýlyq Bolat Saqaýov 79 kg, Almaty qalasynyń ókili Rızabek Aıtmuhan 92 kg jáne aqtóbelik Iýsýp Batyrmurzaev 125 kg salmaqta úzdik atandy.
Jalpy esepte Jambyl oblysy kósh bastasa, astanalyqtar ekinshi, pavlodarlyqtar úshinshi orynǵa kóterildi.
Osylaısha, kúres túrlerinen Qazaqstan spartakıadasy aıaqtaldy.
Eske sala keteıik, budan buryn kilemge qaıta oralǵan Almat Kebispaevtyń grek-rım kúresinen spartakıada chempıony atanǵanyn jazǵan bolatynbyz.
Sondaı-aq Olımpıada júldegeri Elmıra Syzdyqova týǵan kúninde spartakıada jeńimpazy atandy.