Búginde kitap oqıtyndard sany artqan
Almatyda 5 qarashada KITAP FEST KIDS kitap festıvali ótedi. Bul týraly kitap festıvaliniń bas úılestirýshisi Maıra Áljanova aıtty, dep habarlaıdy Almaty-akshamy.kz QazAqparatqa silteme jasap.
Onyń aıtýynsha, festıvál bıyl 8-shi márte ótkiziledi. Onyń barysynda qala turǵyndary men qonaqtar kitaptardy jeńildikpen satyp alyp, ózara kitap almasa alady.
«Pandemıa kezinde bolmasa, festıvál jyl saıyn ótip keledi. Sharanyń negizgi maqsaty – halyqqa kitap oqýdy keńinen nasıhattaý. Ekinshiden, áli tanylmaǵan jas jazýshylarǵa qoldaý bildirý, ıaǵnı, olardyń shyǵarmalaryn halyqqa usyný, óz oqyrmanyn tabýǵa kómektesý. Úshinshiden, baspagerlerdi qoldaý. Bul álemdik kitapfest qaýymdastyǵyna kiretin Qazaqstandaǵy jalǵyz kitap festıvali. Ol barlyq qatysýshylar úshin tegin ótedi»,- dedi Maıra Áljanova.
Spıkerdiń sózinshe, festıvál bıyl balalarǵa arnalady.
«Bıylǵy jyl Prezıdenttiń bastamasymen Balalar jyly ataldy. Sol sebepti bıylǵy kitap festıvali «KITAP FEST KIDS» degen ataýmen ótedi. Balalar úshin qyzyqty sharalar uıymdastyrylady. Biraq, festıvál tek balalarǵa ǵana emes, eresekterge de qyzyqty bolady. Olar belgili qazaqstandyq jazýshylarmen, jas jazýshylarmen kezdesedi, keıingi jyldary jańadan basylyp shyqqan kitaptardyń tusaýkeseri ótedi. Sonymen qatar blogerler jastarǵa óz tájirıbelerimen bólisedi. Eń bastysy, festıválde úlken kitap jármeńkesi ótedi. Onda «Meloman», «Kvıt», «Erýdıt», «Mama pochıtaı», «Qazyna» sekildi iri kitap dúkenderi óz kitaptaryn 20% jeńildikpen usynady», - dedi spıker.
Maıra Áljanova atap ótkendeı, qazirgi tańda qazaq tiline aýdarylǵan sheteldik ádebıetterdi oqyrman jaqsy qabyldaǵan.
«Qazir elimiz jazýshylarynyń kitaptarymen qatar, shet el ádebıetin qazaq tiline aýdaryp, jaryqqa shyǵaryp jatqan baspa úıleri bar. Mysaly, «Qasym», «Steppe & WORLD Publishing» , «Abay Books», «Meloman Publishing «, basqa da baspa úıleri bar. Olar qazaq tiline sheteldik ádebıetterdi, atap aıtqanda, «Dısneı» ertegilerin, Garrı Potterdiń 7 tomdyǵyn jáne ózge de kitaptardy aýdaryp, shyǵardy. Negizi, TMD elderine shetel ádebıetteri Reseı arqyly orys tilinde taraıdy. Olardy qazaq baspa úıleri ana tilimizge aýdarady. Bul – qýanarlyq jaǵdaı",- dedi ol.
Búgingi kúni kitap oqıtyndardyń sany artqany atap ótildi.
«2014 jylmen salystyrǵanda, qazir kitap oqıtyndardyń sany artty. Sebebi, festıválge alǵashqy jyldary 500-1000 adam kelse, sońǵy kitap festıvaline 10 myńǵa deıin adam qatysty. Iaǵnı, qazir kitapsúıer oqyrman kóbeıip keledi. Sondaı-aq qazir kitap dúkenderinde kóp jastardy kóresiz»,- dedi spıker.
Ol sondaı-aq shetelde qazaqtyń klasık aqyn-jazýshylarynyń eńbekteri shet tilderge aýdarylyp, satylatynyn jetkizdi.