Almaty joldarynda “Qorǵaý – Qaýipti júrgizýshi” júıesi JQE buzýdyń 2 myńnan astam deregin anyqtady.
Almaty qalasy PD-nyń habarlaýynsha, “Qorǵaý – Qaýipti júrgizýshi” derekqoryna jalǵan memlekettik nómirleri jáne shetelde tirkelgen MTNB bar, saqtandyrý polısinsiz júrgen kólikter týraly málimetterdi engizý boıynsha kúndelikti jumystar júrgizilýde, dep habarlaıdy Almaty-akshamy.kz Polisia.kz-ke silteme jasap.
«Eki táýlikte patrúldik polısıa ekıpajdary kórsetilgen avtomattandyrylǵan júıeni paıdalana otyryp, jalǵan memlekettik tirkeý nómirin taqqan 30 júrgizýshini, memlekettik nómiri joq 12 avtokólikti, saqtandyrý polısi joq 26 júrgizýshini, mindetti tehnıkalyq baıqaýy joq 27 júrgizýshini ustady. Taǵy 38-ine jol qozǵalysy erejelerin buzǵany úshin tólemegen aıyppuldaryn tóleý týraly habarlama berildi. Osy rette, maqsatty sharalardy júrgizý kezeńinde ınspektorlar, júrgizýshileriniń aıyppul boıynsha iri kólemde qaryzy bar sheteldik tirkeýdegi úsh avtokólikti ustaǵanyn habarlaımyz. Másele myna sommalar týraly bolyp otyr: 1 013 853 teńge, 741 246 teńge jáne 649 356 teńge. Bul kólikter mamandandyrylǵan aıyppul turaǵyna qoıyldy», – dedi Almaty qalalyq PD Jergilikti polısıa qyzmeti basqarmasynyń bastyǵy Erjan Uzabaev.
Bólimsheniń habarlaýynsha, qalada jalǵan memlekettik nómirlerdi paıdalanatyn, kólikterge arnaıy belgi berý qurylǵylaryn ornatqan kólik júrgizýshilerin, sondaı-aq kólikti mas kúıinde basqarǵan adamdardy jaýapkershilikke tartý boıynsha maqsatty jumystar jalǵasýda.