Zaýytty sheteldik ınvestorlar salady. Megapolıstiń negizgi sheteldik ınvestorlary – TMD elderi, Taıaý Shyǵys, AQSH, Túrkıa jáne Izraıl.
Bul týraly Óńirlik komýnıkasıalar qyzmetinde ótken brıfıńte qalalyq kásipkerlik jáne ınvestısıalar basqarmasynyń basshysy Berik Soltanbaev málim etti, dep habarlaıdy Almaty-akshamy.kz QazAqparatqa silteme jasap.
Spıkerdiń aıtýynsha, sheteldik ınvestorlardyń biri Almaty ındýstrıalyq aımaǵynda jelatın shyǵaratyn zaýyt salady.
«Osy maqsatta Iskefe túrik holdıńine 4,5 gektar jer telimi bólindi. Kompanıa zaýyt qurylysyna 9,8 mlrd teńge salyp, 100-den astam turaqty jumys ornyn ashýdy josparlap otyr. Zaýyttyń óndiristik qýaty 7 myń tonnadan astam jelatın shyǵarýǵa múmkindik beredi», - dedi ol.
Taǵy bir ınvestjoba – medısınalyq ortalyqtyń qurylysy.
«International Business Group» JSHS bastamasymen jáne 150 jumys ornyn qurýmen bastaldy. Joba quny – 2 mlrd teńge. Sondaı-aq, iri ınvestor qarajaty esebinen Almaty halyqaralyq áýejaıynyń jańa termınaly salynyp jatyr. «Jańa termınal áýejaıdyń ótkizý qýatyn jylyna qazirgi 2,5 mıllıon jolaýshydan 14 mıllıonǵa deıin arttyrýǵa múmkindik beredi. Jobanyń jalpy quny – 90 mlrd teńge. İske asyrý merzimi 2024 jylǵa josparlanǵan», - deıdi Berik Soltanbaev.
Jalpy, bıylǵy birinshi toqsanda Almatyǵa quıylǵan sheteldik ınvestısıalar aǵyny 1,6 mlrd AQSH dollaryna jetti, bul ótken jylmen salystyrǵanda 40,4%-ǵa kóp.
«Bıyl 2,1 mlrd teńge somasyna eki sheteldik joba iske asyryldy. Olardyń ishinde tehnologıalyq úderisterdi basqarýdyń avtomattandyrylǵan júıeleri men avarıaǵa qarsy qorǵaý júıeleri shkaftaryn shyǵarý boıynsha ınovasıalyq óndiris bar. Jobany Fortune 500 tizimine kiretin, elektrondyq basqarý jáne avtomattandyrý júıeleri naryǵyndaǵy álemdik kóshbasshylardyń biri amerıkandyq Honeywell korporasıasy júzege asyrady», - dedi spıker.