Qazaqstan boıynsha jazyqsyz ustalǵandardyń sany 800 adamnan asady eken.
Almatydaǵy tártipsizdik kezinde negizsiz qýdalaýǵa ushyraǵan 36 adam tergeý ızolátorynan bosap shyqty. Bul týraly búgin buqaralyq aqparat quraldary ókilderine arnaıy brıfıń ótkizgen «Amanat» qoǵamdyq komısıasynyń jetekshisi Abzal Quspan málimdedi, dep habarlaıdy Almaty-akshamy.kz Almaty.tv silteme jasap.
Zańgerlerdiń sózinshe, qazir Túrksib aýdanyndaǵy 155/18 sotqa deıingi tergeý ızolátorynda Almatydaǵy tártipsizdikke qatysy bar degen kúdikke ilingen 200-den astam adam bar eken. Qoǵamdyq komısıa toby olardyń 60-ynyń kinási joq ekenin aıtyp, qalalyq prokýratýraǵa bosatý týraly aryz bergen. Qazir bul aryz-shaǵymdar qaralyp jatyr. Búginde beıbit sherý kezinde ustalǵandarǵa Qylmystyq kodekstiń 272-baby boıynsha is qozǵalǵan. Zań salasynyń mamandary olardyń aldaǵy ýaqytta tolyq aqtalyp shyǵýyna múmkindik bar ekenin aıtady.
«272-bap úsh bólimnen turady. Birinshisi - uıymdastyrýshylarǵa, ekinshisi - qatysýshylarǵa, úshinshisi - arandatýshylarǵa qatysty kózdelgen jaýapkershilik. Biz negizgi aksentti osy 272-baptyń 2-bóligimen qylmystyq jaýapkershilikke tartylǵandarǵa qatysty qoıyp otyrmyz. Óıtkeni, negizgi sandy da osy bólimder berip otyr. Iaǵnı, belgisiz uıymdastyrýshylar men bizge belgisiz arandatýshylardyń sózine erip, abaısyzda arandap qalǵan azamattar quraıdy», - dedi «Amanat» qoǵamdyq komısıasynyń jetekshisi Abzal Quspan.
Prezıdent ákimshiliginiń qoldaýymen jumysyn bastaǵan «Amanat» qoǵamdyq komısıasy endi osy jumysyn elimizdiń basqa da óńirlerinde jalǵastyrmaq nıette. Komısıa músheleriniń sózinshe, elimiz boıynsha jazyqsyz ustalǵandardyń sany 800 adamnan asady eken. Olardyń kópshiligi — jaralylar. Sol sebepti olardyń em-domdy tergeý ızolátorynda emes, úıinde qabyldaýyna jaǵdaı jasamaq. Zańgerler bosatylǵandardyń qoǵamǵa eshqandaı zıany joq ekenin aıtady. Odan bólek, Almatyda «Amanat» qoǵamdyq komısıasynyń atyn jamylyp, jazyqsyz otyrǵandardy shyǵarýǵa aqsha surap, ózderin jarnamalap júrgender de bar eken.
- «Amanat» komısıasynyń jumysy tegin, aqysyz. Biz eshqandaı aqsha, qundy zattar almaımyz. Bizge marapattaý, syıaqy kerek emes. Biz komısıa múshesimiz dep kelip, dosyńyzdy, týysyńyzdy, tanysyńyzdy shyǵaryp beremiz dep kelgenderge aldanyp qalmaýlaryńyzdy suraımyz», - dedi «Amanat» qoǵamdyq komısıasynyń múshesi Mádı Myrzaǵaraev.