Qaladaǵy 15 dárihana buzaqylyq kezinde zardap shekken
Almatyda birinshi qajettilik nysandarynyń jumysy qaıta jandana bastady. Bul týraly Almaty qalasy Kásipkerlik jáne ınvestısıa basqarmasynyń baspasóz hatshysy Anar Tastanbekova aıtyp berdi, dep jazdy Baq.kz.
Onyń aıtýynsha, qalada, ásirese, iri saýda jelileriniń jumysy qaıta iske qosyla bastaǵan. Keshe qalanyń barlyq aýdandarynda Magným, Toımart, Smol sýpermarketteriniń 28 fılıaly ashylǵan. Búgin olardyń 49 fılıaly iske qosyldy, atap aıtqanda, Magnýmnyń 39, Smoldyń 9, Toımarttyń 1 fılıaly.
Onyń aıtýynsha, qaladaǵy dıstrıbútorlardyń qorlarynda azyq-túlik jetkilikti kólemde saqtalǵan. Turǵyndarǵa alańdaýǵa negiz joq.
«Tamaq ónerkisibi salasyndaǵy iri kásiporyndardyń jumysy toqtaǵan joq. «Aqsaı nan» jáne basqa da zaýyttar qalypty jaǵdaıda jumys istep tur. Sondaı-aq, búginnen bastap «Barys», «Almaty-1» jáne «Arystan» bazarlary jumysyn qaıta bastady. Odan bólek, qala boıynsha 44 janarmaı beketi jumys istep tur. Aldaǵy ýaqytta taǵy 25 janarmaı beketi ashylady. Al, janarmaı men dızel otynynyń baǵasy burynǵy deńgeıde saqtalǵan. Suıyltylǵan gazdyń lıtri 70 teńgege deıin tómendetildi», - dedi ol.
A. Tastanbekova sonymen qatar qalada 900 dárihana baryn jáne onyń 200-den astamy jelilik ekenin jetkizdi.
«Qazir qala aýmaǵynda 70 jelilik jáne 40 bólshek saýda dárihanalary jumys istep jatyr. Onyń ishinde 102 dárihana saǵat 08.00-den 19.00-ge deıin, 3 dárihana táýlik boıy jumys isteıdi. Sońǵy málimetterge sáıkes, 15 dárihana buzaqylyq kezinde zardap shekken», - dedi ol.