Forýmda ózekti taqyryptarda pikirtalas alańdary ótedi
Almatyda ál-Farabı ortalyǵynyń 30 jyldyǵyna arnalǵan ⅠⅠ Halyqaralyq Farabı forýmy ótýde, dep habarlaıdy Almaty-akshamy.kz Ǵylym jáne joǵary bilim mınıstrligine silteme jasap.
"Til fılosofıasy jáne Ábý-Nasyr ál-Farabı fılosofıasynyń tili" atty aýqymdy sharanyń maqsaty – ǵulama murasy arqyly qazirgi qoǵam órkendeýiniń rýhanı, tarıhı jáne fılosofıalyq negizin túsindirý.
Iran Islam Respýblıkasynyń Almatydaǵy Bas konsýly Mýhsın Faǵanı forýmda sóılegen sózinde:
"Farabıdi tolǵandyrǵan basty másele – din men fılosofıanyń baılanysy men ıntegrasıasy. Ol ıslam dini men grek danalyǵy arasynda qaıshylyq joq ekenin, al eger qaıshylyq bolǵan jaǵdaıda máseleniń syrtqy kórinisterimen baılanysty dep eseptedi. Ótken jyly Islam revolúsıasynyń kóshbasshysy jáne Qazaqstan Prezıdenti Qasym-Jomart Toqaevtyń ekijaqty kezdesýi barysynda ál-Farabı eńbekterin zertteıtin birlesken ǵylymı komıtet qurý týraly másele talqylandy. Búginde bul ıdeıa júzege asýda", – degen pikirimen bólisti.
Sharaǵa QR Ulttyq ǵylym akademıasynyń músheleri, Qazaqstandaǵy sheteldik konsýldyqtar men sheteldegi ál-Farabı ortalyqtarynyń ókilderi, farabıtanýshy ǵalymdar men dıplomattar, Túrkıa, Nıderlandy, Reseı, Ózbekstannan kelgen jas ǵalymdar qatysýda.
Forým aıasynda "Ábý Nasyr ál-Farabı murasy jáne álemdegi psıhologıalyq ǵylymnyń damýy", "Ál-Farabıdiń tárbıe tili: Mádenıetaralyq qarym-qatynas jáne ulttyq bolmys konteksindegi tulǵa" jáne taǵy basqa ózekti taqyryptarda pikirtalas alańdary ótedi.