Megapolıs turǵyndarynyń kóptegen máselesi qysqa merzimde sheshildi
Turǵyn úı-kommýnaldyq sharýashylyq jáne abattandyrý, densaýlyq saqtaý jáne áleýmettik kómek, ekonomıka jáne kásipkerlik – ár salada almatylyqtardyń jaıly turýy úshin, bıznesti damytý jáne qorshaǵan ortany jaqsartý úshin is-sharalar júzege asyrylýda, dep habarlaıdy Almaty-akshamy.kz.
Aqjar shaǵynaýdanynda aýyzsý máselesi sheshildi.
Naýryzbaı aýdany Aqjar yqshamaýdanynyń turǵyndary 10 jyldan beri aýyzsý tapshylyǵyn kórip kelgen edi. Jańa sorǵy stansasy arqyly yqshamaýdannyń 70%-y taza aýyzsýmen qamtyldy. Qala ákimi Erbolat Dosaev Naýryzbaı aýdanyndaǵy birqatar nysandy aralap, jumys barysymen tanysty.
Qoǵamdyq keńistikti abattandyrý nátıjesin tekserý barysynda qala ákimi jergilikti turǵyndarmen áńgimelesti.
«Almatyda úlken saıabaq salý úshin bos jerdiń bolmaýy qıyndyq týǵyzady, biraq turǵyndardyń jaılylyǵy úshin jergilikti deńgeıde saıabaqtar men skverler salyp jatyrmyz. Osyndaı mysaldyń biri – Naýryzbaı aýdanyndaǵy turǵyndardyń demalysy úshin salynǵan jańa qoǵamdyq keńistik», – dedi Erbolat Dosaev.
Turǵyndar aýdanda ómir súrý sapasyn odan ári jaqsartý maqsatynda ózekti máselelerdi sheshkeni, Aqjar shaǵynaýdanynyń halqyn aýyzsýǵa turaqty qoljetimdilikpen qamtamasyz etkeni úshin alǵysyn bildirdi.
Óńdeý ónerkásibi ósip keledi
Ekonomıka men bıznesti damytýǵa keletin bolsaq, Almatynyń óńdeý ónerkásibi 20% ósim kórsetti. Bıylǵy alǵashqy 6 aıda óńdeý ónerkásibi salasynda óndirilgen ónimniń jalpy quny 979,4 mlrd teńge boldy, bul aldyńǵy kórsetkishtiń besten bir bóligine kóp.
«Onyń ósimi ındýstrıalyq aımaqtyń keńeıýimen, arnaıy ekonomıkalyq aımaqtyń damýymen jáne jańa ónerkásiptik parkterdiń qurylýymen tikeleı baılanysty», – dedi Berik Soltanbaev.
Kásipkerlik jáne ınvestısıalar basqarmasynyń basshysy qazirgi ýaqytta Almatynyń ındýstrıalyq aımaǵyn damytýǵa basymdyq berilgenin de aıtty. Onyń aýmaǵynda qazirdiń ózinde 10 myńnan astam jumys ornyn ashqan 381,4 mlrd teńgege teń 87 joba iske asyrylýda.
Kreatıvti ındýstrıa álemdik ekonomıkadaǵy basym salanyń biri
Sonymen qatar kreatıvti ındýstrıa álemdik ekonomıkadaǵy basym salanyń biri ekenin de atady. Onyń áleýetin eskere otyryp, megapolıs aıasynda osy salany tıimdi ári sapaly damytýdyń oń sheshimi tabyldy.
«Byltyr Memleket basshysy qala halqymen kezdesý barysynda bastapqy kapıtaly 10 mlrd teńge bolatyn kreatıvti ındýstrıanyń qalalyq venchýrlyq qoryn qurý jónindegi bastamany qoldady, ondaǵy 5 mlrd teńge jergilikti búdjetten bólindi, qalǵan 5 mlrd teńge jeke ınvestısıalar esebinen tartyldy», – dedi Berik Soltanbaev.
Almatyda ónerkásip parkteriniń 30 myń sharshy metrden astam úı-jaılary salynǵan. Qazirdiń ózinde olar kásipkerlik sýbektilerimen tolyqty jáne 2025 jylǵa qaraı aýdanyn 250 myń sharshy metrge deıin ulǵaıtý josparlanǵan.
Bala bizdiń bolashaq
Qalada balalardy emdeý úshin densaýlyq saqtaý salasynda birqatar jumys jasaldy.
Almaty qalalyq ákimdik málimetinshe megapolıste balalardy táýlik boıy 8 medısınalyq uıym ońaltýdan ótkizedi.
Eki kezeńdi ońaltý - neırohırýrgıalyq, nevrologıalyq, kardıologıalyq jáne travmatologıalyq beıinder boıynsha №2 qalalyq balalar klınıkalyq aýrýhanasynyń bazasynda, sonymen qatar, eki baǵyt: neırohırýrgıalyq jáne travmatologıalyq baǵyttar boıynsha júrgiziledi. 3 kezeńdi ońaltý bes memlekettik balalardy ońaltý ortalyǵynda jáne bir jekemenshik ortalyqta júrgiziledi.
Ár balaǵa 43 myń teńge
Bıyl 1-synypqa baratyn balalarǵa keletin bolsaq, Almatyda «Jalpyǵa birdeı bilim berý» qorynan 2023 jyly mektep formasy men keńse kerek-jaraqtaryn satyp alý úshin bir balaǵa 43 myń teńge jumsalady eken. Almaty qalasy bilim basqarmasynyń aqparaty boıynsha, osy qordan HÁOT sanatyndaǵy (halyqtyń áleýmettik osal toptary) 15 myńnan astam oqýshy kómek aldy.
Eske salsaq, «Jalpyǵa birdeı bilim berý» qory jergilikti búdjetten qarjylandyrylady.
Jastar qonys toıyn toılady
Al megapolıstiń 200 turǵyny «Almaty jastary» baǵdarlamasy aıasynda 2023 jyldyń basynan beri qonys toıyn atap ótti.
Qala ákimdigi megapolıstiń tarıhı kelbeti týraly umytpaıdy.
Tarıhtan syr shertken «Myń tamshy»
Ekologıa jáne qorshaǵan orta basqarmasynyń mamandary Almatydaǵy «Myń tamshy» tarıhı sýburqaǵy qalpyna keltirilgenin málimdedi.
«Almaty qalasynyń Ekologıa jáne qorshaǵan orta orta basqarmasy Severnyı alańynda qaıta jóndeý jumysyn júrgizdi. Saıabaq aýmaǵynda sýarý júıesi qalpyna keltirildi. Sonymen qatar sýburqaq jańartylyp, eń bastysy tarıhı kelbetin saqtap qaldy», – dedi Ekologıa jáne qorshaǵan orta basqarmasynyń bas mamany Dýman Qaptaǵaev.
Almatyda avtokólik ıeleri úshin biryńǵaı turaq keńistiginiń tujyrymdamasy ázirlenýde. Onda tarıfti, onyń ishinde rezıdenttik ruqsattardy anyqtaý ádisi qarastyrylǵan. Aqyly komýnaldyq avtoturaqtardy paıdalaný erejesi Almaty qalasy ákimdiginiń 2020 jylǵy qaýlysymen retteldi. Bul qujatta rezıdenttik kelisimder qarastyrylmaǵan.
Serkan sózinde turdy
Sondaı-aq ákimdik áýejaıda turaq pen kóp saǵattyq kezek máselesin atap ótti. TAV Airports Holding kompanıasynyń prezıdenti Serkan Kaptanmen ótken keńeste qala ákimi Erbolat Dosaev ınvestordyń nazaryn Almaty áýejaıynda qyzmet kórsetý sapasyna baılanysty birqatar problemalyq máselelerge aýdardy. Qala turǵyndary men qonaqtary kóp saǵattyq kezekterdi, bagajdy uzaq kútýdi, turaq oryndarynyń jetispeýshiligin jáne tıisti sharalar qabyldaýdy talap etetin basqa da qolaısyzdyqtardy atap ótedi.
Áýejaı ákimshiligi qyzmet kórsetý sapasyn jaqsartý boıynsha sharalar qabyldaýda-bagaj jelileri jańartyldy, jańa kondısıonerleý júıeleri ornatyldy, jaıly avtobýstar satyp alyndy.
Jańa jolaýshylar termınaly ashylǵan kezde áýejaı ákimshiligi eskisin jańartýdy josparlap otyr. Osylaısha, jańa jolaýshylar termınaly tek halyqaralyq reısterge, al qoldanystaǵy termınal ishki reısterge qyzmet kórsetedi.
Erbolat Dosaev qurylys jumystarynyń aıaqtalýyn jedeldetý qajettigin atap ótip, nysannyń strategıalyq mańyzdylyǵyna baılanysty Almaty ákimdigi tarapynan jan-jaqty qoldaý kórsetýge daıyn ekendigin bildirdi.
Buǵan deıin Almaty halyqaralyq áýejaıynyń jańa jolaýshylar termınaly ǵımaratynyń ashylýy 2024 jyldyń tamyzynda josparlanǵan bolatyn.