Almaty qalasyna jumys sapary aıasynda QR Sybaılas jemqorlyqqa qarsy is-qımyl agenttiginiń Tóraǵasy Marat Ahmetjanov joǵary bilim berý salasyndaǵy sybaılas jemqorlyqqa qarsy is-qımyl máseleleri boıynsha keńes ótkizdi, dep habarlaıdy almaty-akshamy.kz
Keńeske Qazaqstan Respýblıkasynyń Bilim jáne ǵylym mınıstri Asqat Aımaǵambetov, Almaty qalasynyń ákimi Baqytjan Saǵyntaev, elimizdiń joǵary oqý oryndarynyń rektorlary, ǵylymı jáne saraptamalyq qoǵamdastyq qatysty.
Keńeske qatysýshylarǵa jyly lebiz bildirgen Almaty ákimi B. Saǵyntaev megapolıstiń dástúrli túrde elimizdiń bilim berý ortalyǵy bolyp tabylatynyn, onda 180 myńǵa jýyq oqýshy jastar – JOO stýdentteri bar ekenin atap ótti.
Osyǵan oraı jastar arasynda sybaılas jemqorlyqqa qarsy mádenıetti qalyptastyrýǵa erekshe kóńil bólinedi.
«Óskeleń urpaqtyń boıynda sybaılas jemqorlyqqa qarsy sanany qalyptastyrý bilim berý salasy qyzmetiniń sapasyn, tıimdiligin baǵalaýda mańyzdy krıterıı bolyp tabylady. Qalanyń barlyq aýdandarynda «Adaldyq alańy» front-ofısteri jumys isteıdi. JOO-men birlesip «Sanaly urpaq» jáne «Parasat» jobalyq ofısterin qurý boıynsha jumys júrgizilýde. Barlyq joǵary oqý oryndarynda eriktiler «Adal kómek» jáne «Akselerator meıirimi: İzgilik elshisi» taqyryptarynda bilim alýshylar úshin zańgerlik keńester ótkizedi», - dep habarlady Baqytjan Saǵyntaev.
Kezdesýde joǵary bilim berý salasyndaǵy sybaılas jemqorlyqqa qarsy is-qımyl aıasynda negizgi problemalyq máseleler talqylandy, sondaı-aq jurtshylyqty keńinen tarta otyryp, sarapshylyq qoǵamdastyǵy arasynda belsendi talqylanatyn 2022-2026 jyldarǵa arnalǵan sybaılas jemqorlyqqa qarsy saıasat Tujyrymdamasynyń jobasy tanystyryldy.
«Bilim berý júıesindegi sybaılas jemqorlyq memlekettiń bolashaǵyna tikeleı qaýip tóndiredi. Onyń aldyn alatyn quraldar bar, tek olardy paıdalaný kerek. Sondyqtan bizdiń ortaq mindetimiz – ony azaıtý jáne joıý úshin barlyq qajetti sharalardy qabyldaý. Joǵary oqý oryndarynan adal eńbekti baǵalaıtyn jáne óz otanyna qamqorlyq kórsetetin elimizdiń laıyqty azamattaryn tárbıelep shyǵarý», - dep atap ótti Sybaılas jemqorlyqqa qarsy qyzmettiń basshysy.
Sonymen qatar, keńeste elimizdiń ýnıversıtetterinde sybaılas jemqorlyqqa qarsy komplaens-qyzmetterdi engizý jáne stýdentter arasynda sybaılas jemqorlyqqa qarsy mádenıetti qalyptastyrý jónindegi keshendi josparlardy iske asyrý máseleleri talqylandy. Sybaılas jemqorlyqqa qarsy qyzmet pen onyń aýmaqtyq bólimsheleri ýnıversıtetter qurylymynda kórsetilgen qyzmetterdi ashý, sondaı-aq sybaılas jemqorlyqqa qarsy komplaens ınstıtýtynyń jumysyn uıymdastyrý bóliginde barlyq múmkin ádisnamalyq kómek kórsetetin bolady.
Kezdesýdiń «ashyq dıalog» túrindegi formatyn eskere otyryp, ǵylymı qoǵamdastyq pen JOO basshylyǵy bilim berý salasynda sybaılas jemqorlyqqa qarsy saıasatty iske asyrý máseleleri boıynsha óz pikirleri men ıdeıalarymen bólisti.
Kezdesý qorytyndysy boıynsha Sybaılas jemqorlyqqa qarsy qyzmet pen Bilim jáne ǵylym mınıstrligi arasynda yntymaqtastyq týraly Memorandýmǵa qol qoıyldy. Taraptar birlesken jumystyń josparlary men jobalaryn talqylady.