Almatyda esirtki satýshy men pornostýdıa ıesi ustaldy, – dep habarlaıdy Almaty-akshamy.kz Inform.kz-ke silteme jasap.
Jedel áreket esirtki qylmysyna qarsy kúres bólimshesiniń qyzmetkerlerin Almatydaǵy túngi klýbtardyń birine apardy. Onda 20 jastaǵy V. esimdi azamat kózge tústi.
«Ol jumys ornynda ustaldy. Jeke tintý barysynda kúdiktiden klıentke satpaq bolǵan sıntetıkalyq esirtki salynǵan býma tárkilendi. Mámile bolǵan joq. Saraptama qorytyndysyna sáıkes, esirtki psıhotroptyq zat metkatınon – 4 metılmetkatınon (mefedron) analogy. Sonymen qatar osy klýbtyń turaqty kelýshileriniń biri – 26 jastaǵy M. esimdi azamatqa qatysty da jedel jáne arnaıy is-sharalar ótkizildi. Onyń turǵylyqty jeri boıynsha ruqsat etilgen tintý júrgizildi. Turǵyn úıdegi kádimgi páter, belgili bolǵandaı, esirtki tutynatyn adamdardyń ornyna aınaldy. Sol jerde 6 adam ustaldy. Qazir olardyń jeke basy tekserilip jatyr», – dedi Almaty qalalyq PD Esirtki qylmysyna qarsy kúres basqarmasynyń bastyǵy Erlan Álmaǵambetov.
Jedel ýákilderdiń aıtýynsha, esirtki tutynatyn orynnyń ıesi pornostýdıany da qurǵan. Ol Almaty qalasynyń elıtalyq shaǵyn aýdanynda ornalasqan.
«Onda 18 jáne 22 jastaǵy eki qyz jumys istegen. Jedel derekterge sáıkes, olar – nashaqorlar. M. esimdi azamat olardy esirtkimen qamtamasyz etedi. Pornografıalyq mazmundaǵy beınerolıkter taratylatyn WEBKAM stýdıany er adam birneshe aı buryn qurǵan. Qazirgi ýaqytta onyń áreketin QR QK-niń 311-baby boıynsha saralaý máselesi sheshilýde. Negizgi qylmystyq is QR QK-niń 297-baby 1-bóligi boıynsha sotqa deıingi tergeýdiń biryńǵaı tizilimine tirkeldi», – dedi Álmaǵambetov.