Jeldiń ekpini sekýndyna 15-20 metrge deıin jetýi múmkin
Almatylyqtarǵa qalalyq Tótenshe jaǵdaılar departamenti ekpindi jel týraly eskertý jasady, dep habarlaıdy Almaty-akshamy.kz.
"Almaty qalasynyń Tótenshe jaǵdaılar departamenti "Qazgıdromet" RMK-nyń 2023 jylǵy 6 sáýirdegi № 03 eskertýine súıene otyryp eskertedi! Almatyda erteń, 7 sáýirde, ońtústik-batystan jel soǵady, kúndiz ekpini sekýndyna 15-20 metrge deıin jetýi múmkin", - delingen Almaty qalalyq Tótenshe jaǵdaılar departamenti habarlamasynda.
TJD qyzmetkerleri turǵyndardy mynadaı saqtyq sharalaryn saqtaýǵa shaqyrady:
"Almaty qalasynyń Tótenshe jaǵdaılar departamenti turǵyndarǵa kópirler, qoıma jáne aǵashtardan aýlaq bolýdy usynady. Adamdy ushyp ketken butaq, synǵan shıfer, jol belgisi soǵýy múmkin. Jerasty ótkelderinde, metro stansıalarynda nemese ǵımarattar tasasynda jasyryna alasyz. Bılbordtardan, mańdaıshalardan, aıaldamalardan, pavılondardan, baǵdarshamdardan alys júrý kerek. Qala turǵyndaryna kólikterdi aǵashtardyń astynda qaldyrmaý usynyldy",- delingen habarlamada.