Olar dástúrli oqytý formatyna oralǵan.
Almatylyq ata-analar epıdahýaldyń jaqsarýyn baqylaı otyryp, qashyqtan oqytý formatynan bas tartyp, balalaryn mektepke jiberdi, dep habarlaıdy Almaty-akshamy.kz.
Bilim jáne ǵylym mınıstrliginiń málimeti boıynsha, jańa oqý jylynyń basynda Almatydaǵy epıdemıologıalyq jaǵdaıǵa baılanysty ata-analarǵa oqytý formatyn tańdaý múmkindigi berildi. Sol kezde bilim alýshylardyń arasynda onlaın formatty tańdaǵandardyń sany az boldy. Iaǵnı, oqýshylardyń tek 5,6%-y, ıaǵnı 300 myńnan astam oqýshynyń tek 17 myńnan kem emes bóligi onlaın formatta oqýǵa nıetti boldy.
«Meniń nemerem bıyl birinshi synypqa bardy. Oryn alǵan epıdjaǵdaıǵa alańdap, onlaın oqytý formatyn tańdadyq. Alaıda, nemerem úıde otyrmaı, synyptastarymen jáne muǵalimdermen aralasqysy keledi. Báribir balalarymyz kóshede oınap, dúkenge jáne qonaqqa barady, úıirmelerge qatysady. Sondyqtan biz dástúrli oqytý formatyn tańdadyq. Biz qashyqtan bilim alatyn balanyń erinshektik tanytyp, nazary basqa nárselerge aýatynyn, qosymsha basqa da istermen aınalysatynyn ári oqý materıalyn jetkiliksiz deńgeıde meńgeretinin túsindik. Pandemıa qashan aıaqtalatyny belgisiz. İndettiń aıaqtalýyn kútip, bilim sapasyn joǵaltyp almaǵanymyz mańyzdy», – dep atap ótti Almaty qalasynyń turǵyny Gúlbahar Valıeva.
Almaty qalasy ákimdigi bilim basqarmasynyń basshysy Lázzat Jylqybaeva qalada 300-ge jýyq mektep bar ekenin atap ótti.
Oqýshylardyń jalpy sany boıynsha balalardyń syrqattaný paıyzy oqý jyly bastalǵanǵa deıingi syrqattaný deńgeıimen salystyrǵanda birneshe ese tómen. Mektepterde balalardyń densaýlyǵyn qorǵaýdy qamtamasyz etý úshin keshendi sanıtarlyq sharalar qabyldandy.
«Ikemdi sabaq kestesi qurylyp, bastaýysh, orta jáne joǵary synyp oqýshylary úshin qosymsha aýysymdar men ártúrli ýaqytta úzilister uıymdastyryldy. Oqýshylardyń bir kabınetten ekinshi kabınetke aýysýyna tyıym salyndy. Sabaqtar «bir synyp – bir kabınet» qaǵıdaty boıynsha júrgiziledi. Muǵalimder men ata-analar arasynda sanıtarlyq talaptardy saqtaý boıynsha túsindirý jumystary júrgizilip jatyr», – deıdi Lázzat Jylqybaeva.