Almatyda reıderlik áreketke barǵan qylmystyq top ustaldy.
Olardyń memlekettik organdarmen baılanysy bary da belgili boldy, dep habarlaıdy Almaty-akshamy.kz
Bul týraly qalalyq Ekonomıkalyq tergep-tekserý departamenti habarlady.
Qylmyskerler zorlyq-zombylyq, qoqan-loqy, bopsalaý arqyly elimizdegi belgili kásipkerlerdi óz múlkin tegin berýge májbúrlegen. Búginde Almaty oblysy men Almaty qalasynda olardyń reıderlik shabýylyna qatysty 4 derek anyqtaldy. Qazaqstannyń taǵy 3 oblysynda osyǵan uqsas qylmys jasalǵany jaıly aqpar bar.
«Top avtokólik, qymbat jyljymaıtyn múlik jáne taǵy basqa múlikterdi alǵan, jasyrysyn bıznespen belsendi aınalysqan. Qazirgi ýaqytta toptyń belsendi músheleri ustaldy. Sotqa deıingi tergep-tekserý júrgizilýde. QR QK 201 babyna sáıkes ózge málimetter jarıa etilmeıdi», - deıdi QR Qarjylyq monıtorıń agenttigi baspasóz qyzmetiniń ókili Álibek Ábdilov.