Almatyda mektepterdiń jańa oqý jylyna daıarlyǵy aıaqtalyp qaldy. Ásirese birinshi synyp oqýshylaryn qabyldaýǵa, olardy oqýlyqpen qamtyp, bastaýyshtaǵylarǵa tegin tamaqtandyrý jaǵyn uıymdastyrýǵa kóp kóńil bólinip jatyr. Qalalyq Bilim basqarmasynyń málimetinshe, 2025 jylǵy 20 tamyzda birinshi synypqa 26 991 bala qabyldanǵan. Olardyń 57%-y oqýyn qazaq tilinde, 42%-y orys tilinde bastamaq.
«Bizdiń basty maqsatymyz – ár balanyń oqý jylyn tolyq daıarlyqpen bastap, oqýlyqpen, tamaqpen, qajet bolǵan jaǵdaıda qoldaý kórýine kóńil bólý. Bulardy mekteptermen, ata-analarmen birlese otyryp ýaqtyly ise asyryp jatyrmyz», - dedi Almaty qalasynyń Bilim basqarmasynyń basshysy Saıran Saıfedenov brıfıń kezinde.
Jańa oqý jylynda 1–4 synyp oqýshylaryn tegin tamaqtandyrýǵa 16,8 mlrd teńge bólindi. Iaǵnı, bul 127 myńnan astam bala tegin ystyq tamaqpen qamtylady degen sóz. Áleýmettik qoldaý kórsetý jaǵy da umyt qalǵan joq. «Mektepke jol» respýblıkalyq aksıasy aıasynda «Vseobých» qory 13 myń balaǵa mektep formasyn satyp alýǵa 715 mln teńge, áleýmettik osal otbasydan shyqqan 10 myńnan astam oqýshyny tamaqtandyrýǵa 1,4 mlrd teńge bóldi. Onyń 74%-yn ata-analardyń bank kartasyna aýdaryp úlgerdi.
Oqýlyqpen qamtý da erekshe baqylaýǵa alynǵan. 2025–2026 oqý jylyna Almaty qalasy 3,3 mlrd teńgege 884 myńnan astam oqýlyq satyp alyp jatyr. Barlyq baspamen, jetkizýshilermen kelisimsharttar jasalyp qoıǵan, bul osy kitaptardy mektepterge der kezinde jetkizýge múmkindik bermek.