Almatyda tehnıkalyq jáne kásíptík bílím beru (TjKB) júıesí qarqyndy damyp keledí. Qazaqstanda jarıyalanǵan Jūmysshy mamandyqtar jylynda osy máselege kóp kóńíl bólíndí. Búgínderí qalalyq TjKB jelísíne 88 kolledj kíredí, onyń íshínde 22-sí memlekettík te, 66-sy jekemenshík. Onda 85 544 adamnyń 46 838-í memlekettík tapsyrys boıynsha bílím alyp jatyr. Óńírlík kommunıkatsıyalar qyzmetínde Almaty qalasy Bílím basqarmasynyń basshysy Saıran Saıfedenov osylaı dep málímdedí.
2025-2026 oqu jylyna memlekettík grantqa 18 myńnan astam ótínísh túsken. Talapkerlerdí tamyz aıynyń sońyna deıín qabyldaıdy. Qazír mamandar 131 mamandyq, 220 bílíktílík boıynsha bílím alyp jatyr.
Bıyl kolledjderdí jańǵyrtu jaǵy da kúsheıtíldí. «Jas maman» jobasy ayasynda 18 oqu orny qūral-jabdyqpen jabdyqtaldy. Būǵan 4,2 mlrd teńge jūmsalmaq. Sondaı-aq, bıyl jóndeu jūmysyna 2,4 mlrd teńge bólíndí. Onyń 170 mln teńgesí alty kolledjdíń materıaldyq bazasyn jańartuǵa jūmsaldy.
Almatyda tehnıkalyq jáne kásíptík bílím beru salasyna erekshe kóńíl bólíníp otyr. Qazír qalada bírqatar jańa joba qolǵa alynǵan. Sonyń íshíndegí eń úlkení - Almaty kólík jáne mehanıka kolledjíníń jańa ǵımaraty. Ol 1050 studentke eseptelgen, íshínde 120 oryndyq jataqhana bolady. Taǵy bír kolledjde bólek, taǵy bír kolledjde 300 oryndyq qosymsha ǵımarat salynady. Olardy qarasha aıynyń sońyna qaraı qoldanysqa beru josparlanǵan.
Alatau audanyndaǵy Alǵabas yqshamaudanynda ınnovatsıyalyq tehnıkalyq kolledj salu bastalyp kettí. Joba ayasynda oqu korpusy, jataqhana, sheberhanalar, sport jáne demalys alańdary, tolyq ınfraqūrylym salu kózdelgen. Qūrylysy 2026 jyldyń aqpanyna taman ayaqtalmaq.
Qalalyq TjKB júıesíne bólíngen byudjet – 52,1 mlrd teńge. Onyń 679 mln teńgesí tálímgerlík baǵdarlamalardy damytuǵa, WorldSkills chempıonatyn ótkízuge, jataqhana kútímí men kolledjderdí qarjylaı qoldauǵa baǵyttaldy.
Jūmysshy mamandyqtar jyly ayasynda jasalyp jatqan ís-sharalar jastarǵa jańa múmkíndík ūsynyp, eńbek naryǵynda sūranysqa ıe kadrlardy dayarlauǵa jol ashyp otyr.