Qaýipti vırýsty qala boıynsha 239 bala juqtyryp, aýrýhanalarda em alyp jatyr.
Almatyda koronavırýs ınfeksıasy balalar arasynda da órship barady. Búginde bul qaýipti vırýsty qala boıynsha 239 bala juqtyryp, aýrýhanalarda em alýda, dep habarlaıdy Almaty-akshamy.kz Almaty.tv saıtyna silteme jasap.
Qaladaǵy klınıkalyq balalar juqpaly aýrýlar aýrýhanasynyń ekinshi stasıonarynyń ózinde 148 naýqas tirkelip, olardyń 80 paıyzynyń jaǵdaıy ortasha aýyr dep baǵalanyp otyr.
«Em alyp jatqan balalardyń bári protokol boıynsha em qabyldaıdy. Solardyń shaǵymdary, analızderine qaraı búkil em júrgiziledi. Barlyqtarynyń jaǵdaıy ortasha, turaqty bolyp esepteledi. Barlyǵy aman-esen úıine shyǵarylady. Ata-anasymen birge jatyp em qabyldaıdy», – dedi balalar qalalyq klınıkalyq juqpaly aýrýlar aýrýhanasynyń bólim meńgerýshisi Baıan Ospanbaeva.
Odan bólek, bul aýrýhanaǵa COVID-19 vırýsyn juqtyrǵan eresekter de qabyldanyp jatyr. Qazir olardyń sany 411-ge jetti. Al, aýyr haldegi 5 adam ókpeni jasandy jeldetý apparatyna qosylǵan.